Dreamer

ஸ்டார்ஸ் ஆஃப் அம்புலி 3D

2012-02-08T00:19:00.000+05:30

வணக்கம் நண்பர்களே...

'அம்புலி 3D' திரைப்படத்தில் இடம்பெறும் முக்கிய கதாபாத்திரங்களை பற்றிய பாத்திரப்படைப்பு விவரங்களை அளிக்கும் 'ஸ்டார்ஸ் ஆஃப் அம்புலி' என்ற மைக்ரோ விளம்பர வீடியோக்களை இன்றுமுதல் வெளியிட்டிருக்கிறோம். அந்த வரிசையில் முதல் வீடியோவில் படத்தின் கதைநாயகனான வேந்தன் பற்றிய காணொளி இதோ...

தொடர்ந்து மற்ற கதாபாத்திரங்கள் பற்றிய விவரங்கள் அடங்கிய மைக்ரோ வீடியோக்கள் விரைவில் வெளிவரும்... பார்த்துவிட்டு உங்கள் கருத்துக்களை பகிரவும்...

அன்புடன்
ஹரீஷ் நாராயண்

தமிழ் படங்களுக்கும் டிஜிட்டல் போஸ்டர்கள் உண்டு

2012-01-31T15:42:00.000+05:30

வணக்கம் நண்பர்களே,
சமீபத்தில் ஒரு ஆங்கில நாளிதழில் MOTION POSTERS எனப்படும் டிஜிட்டல் போஸ்டர்களை பற்றிய ஒரு கட்டுரை எழுதியிருந்தார்கள். அதில் ஹிந்தி படங்கள் டிஜிட்டல் போஸ்டர்களை வெளியிட ஆரம்பித்திருப்பதாகவும், தமிழ்ப்படங்களும் இனிமேல் இந்த வகையான டிஜிட்டல் போஸ்டர்களை வெளியிட ஆரம்பிக்கும் என்றும் குறிப்பிட்டிருந்தார்கள்...

இனிமேலென்றில்லை... நம் அம்புலி படத்துக்காக ஜூலை 23, 2011 அன்றே (ஷூட்டிங் முடிந்து போஸ்ட் ப்ரொடக்ஷன் ஆரம்பிக்கும்போது) ஒரு மோஷன் போஸ்ட்ரை வெளியிட்டிருந்தோம்...

MOTION POSTER #01 OF AMBULI

அதன் பிறகு மீண்டும் டிசம்பர் 31, 2011 மற்றும் ஜனவரி 29, 2012 அன்று என்று மொத்தம் இதுவரை மூன்று மோஷன் போஸ்டர்களை வெளியிட்டிருக்கிறோம்...

MOTION POSTER #02 OF AMBULI

MOTION POSTER #03 OF AMBULI

சரி, நாங்கள் புதியவர்கள் எங்களது படம் பெரிய நட்சத்திர படம் இல்லை என்று எடுத்துக் கொண்டாலும், இயக்குநர் ஷங்கர் அவர்களின் சமீபத்திய படமான 'நண்பன்' படத்தின் சார்பாகவும் ஒரு மோஷன் போஸ்டர் டிசம்பர் 27, 2011 அன்று வெளிவந்திருக்கிறது... இதோ...

நாளிதழ்கள் வரலாற்று பதிவுகள் என்றிருக்கும்போது இதை எப்படி எடுத்துக் கொள்வது என்று தெரியவில்லை...

அன்புடன்
ஹரீஷ் நாராயண்

அம்புலி 3D : திரை ஜாலம் இதோ...

2012-01-28T22:38:00.000+05:30

வணக்கம் நண்பர்களே,

எங்கள் படத்தின் சார்பாக ஒரு SCREEN MIMING எனப்படும் திரைஜால ப்ரெசென்டேஷன் இதோ...

பார்த்துவிட்டு உங்கள் கருத்துக்களை பகிரவும்.

அன்புடன்
ஹரீஷ் நாராயண்

2012 புத்தக கண்காட்சி

2012-01-08T14:26:00.002+05:30

முதலில் நண்பர் கேபிள் சங்கரின் 'தெர்மகோல் தேவதைகள்', என். உலகநாதனின் 'நான் கெட்டவன்', யுவகிருஷ்ணாவின் 'அழிக்கப்பிறந்தவன்' என்ற புத்தக வெளீயிட்டிற்கு நான் மற்றும் எனது அம்புலி திரைப்படக்குழுவினரின் மனமார்ந்த வாழ்த்துகளை தெரிவித்துக் கொள்கிறேன். கேபிளார் வெளியீட்டு விழாவுக்கு அழைத்திருந்தார், ஆனால் திரைப்பட ஃபைனல் கரெக்ஷன் வேலைகளும் அதே நேரத்தில் இடம்பெற்றுவிட்டதால் இந்த புத்தக வெளியீட்டில் பங்கு பெற முடியாதமைக்கு கேபிள்ஜி என்னை மன்னித்துக் கொள்ளவும்... அவர் எப்படியும் நிறைய புக் எழுதத்தான் போகிறார்... கண்டிப்பாக அந்த புத்தக வெளியீடு அத்தனையிலும், மேலும் அவர் எடுக்க போகும் திரைப்படங்களின் விழாக்கள் அத்தனையிலும் நிச்சயம் கலந்து கொள்ளும் ஆசையுடன் காத்திருக்கிறேன்...

இந்த வருட புத்தக கண்காட்சி அனுபவம்...

நானும், நண்பர் ஹரியும், கேமிராமேன் சதீஷ்.G-யும் 6.30 மணிக்கே கிளம்பிவிட்டோம்... வழியில் டிராஃபிக் ஜாம் காரணத்தால் 7.30 மணிக்குதான் போய் சேர முடிந்தது... அதுவும் ஹாரிங்டன் ரோடு -பூந்தமல்லி ஹைரோடு சிக்னலில் நின்றிருந்த நேரம், கண்முன்னே கண்காட்சி வாயில் தெரிய, நீண்ட சிக்னலில் மாட்டிக்கொண்டு தவித்த அந்த 120 செகண்டுகள் மிக நரகமாய் கழிந்தன... க்ரீன் விழுந்ததும் சீறிப்பாய்ந்து உள்ளே நுழைந்தோம்...

டிக்கெட் கவுண்டரிலிருந்து உள்ளே நுழைந்ததும், குமுதம் விளம்பர பலகை வரவேற்றது... 'குமுதம்' பேனர் பார்த்ததும் பெ.கணேஷின் புத்தகங்கள் நினைவுக்கு வந்தன, ஸ்டால் நம்பரை குறித்துக் கொண்டு மெல்ல நகர்ந்தோம்... எங்கு நுழைவது... என்ன எடுப்பது என்று தெரியாமல் குழப்பத்துடன் அங்குமிங்கும் கண்ணில் மாட்டிய புத்தக அட்டைகளை பார்த்துக் கொண்டு நகர ஆரம்பித்தோம்... முதலில் நுழைந்தது 'அந்திமழை.காம்' ஸ்டாலுக்குள்... (ஸ்டால் எண் ஞாபகமில்லை)... அதிகம் சினிமா சம்பந்ப்பட்ட புத்தகமே இருந்தன...இந்த வருடம் நான் வாங்கிய முதல் புத்தகம் இயக்குநர் மகேந்திரன் அவர்கள் எழுதிய 'மக்கள் திலகம் - எனது பார்வையில்'...

பிறகு, 'அடூர் கோபாலகிருஷ்ணனின் எனது சினிமா அனுபவங்கள்' தமிழாக்கம் சுகுமாரன்... அங்கேயே வைரமுத்து அவர்களின் 'கொஞ்சம் தேநீர் நிறைய வானம்' மற்றும் நம்ம கேபிள் சங்கரின் 'சினிமா வியாபாரம்' (ப்ளாக்கில் படித்திருந்தாலும், நிச்சயம் சேகரித்து வைக்க வேண்டிய தகவல்கள்), அங்கேயே செழியன் அவர்கள் எழுதிய 'பேசும் படம்'... ரவிக்குமாரின் 'மிகைநாடும் கலை' என்று சினிமா சம்பந்தபட்ட புத்தகங்களை இந்த ஸ்டாலிலேயே முடித்துக் கொள்ள வாய்ப்பு கிடைத்தது... பில் போடுபவர் 'நீங்க சுகுமாரன் படிச்சிருக்கீங்களா..?' என்று கேட்டார்... 'இல்லை இப்போதுதான் அவரது தமிழாக்கம் எடுத்திருக்கிறேன்' என்றேன்... 'இதைப் படிச்சு பாருங்க' என்று 'வேழாம்பல் குறிப்புகள்' என்று புத்தகத்தை கொடுத்தார்... பெற்றுக் கொண்டேன்...

அங்கிருந்து தமிழ் ஆராய்ச்சி தொல்லியல்துறை ஸ்டாலுக்குள் செம்ம வேட்டை நடந்தது... யோ.கில்பட் எழுதிய 'ஔவையார் பாடல்களின் கருத்துக்கள்', 'நல்ல தமிழ்ப் பெயர்கள்' (கதை எழுதும்போது ஒருத்தருக்கு பெயர் சூட்டுவதற்குள் போதும் போதும் என்றாகிவிடுகிறது... என்பதால் இந்த புத்தகம்)... முனைவர். ராசு பவுன்துரை எழுதிய 'பண்டையத் தமிழக வரைவுகளும் குறியீடுகளும்', மரு.முனைவர் செ. பிரேமா எழுதிய 'இசை மருத்துவம்', ரா. பாலசுப்பிரமணியம் எழுதிய 'தமிழர் நாட்டு விளையாட்டுக்கள்', நா. சுப்பிரமணியம் எழுதிய 'கல்வெட்டு சொல் அகராதி'...

நேரமாகிக் கொண்டே போனதால், சில குறிப்பிட்ட ஸ்டால்களை மட்டும் விசிட் செய்ய முடிவெடுத்தேன்.

ஆங்காங்கே கண்ணில் சிக்கியவைகளில்

சாண்டில்யனின், மலைவாசல், ஜல தீபம் (1,2,3), ஜெயமோகனின் குறுநாவல்கள் மற்றும் ஆல்டைம் ஃபேவரைட் சுஜாதா அவர்களின் 'விவாதங்கள் விமர்சனங்கள்', 'இதன் பெயரும் கொலை', 'என் இனிய இயந்திரா', 'சுஜாதாவைக் கேளுங்கள்', 'கணையாழியின் கடைசிப் பக்கங்கள்', 'சுஜாதாட்ஸ்', 'ஆரியபட்டா', 'ஏன்? எதற்கு? எப்படி' பாகம் - 2', '21ஆம் விளிம்பு', 'இரயில் புன்னகை', 'ஓலைப்பட்டாசு', '6961', 'கருப்புக் குதிரை' என்று இந்த முறையும் என் லிஸ்டில் லீடிங் இவர்தான்... வாழ்க சுஜாதா சாரின் புகழ்...

இந்திரா சௌந்தர்ராஜனின் 'என் யாத்திர அனுபவங்கள்...' ஏதோ ஒரு பாக்கெட் நாவலில், இவரது சதுரகிரி யாத்திரையில் 'ரகசியமாய் ஒரு ரகசியம் (இதுதான் மர்ம தேசம் 'ரகசியம்' என்று 'விடாது கருப்பு'க்கு முன்பு தொலைக்காட்சி தொடராய் வந்தது) என்ற நாவல் எழுதுவதுக்கான உந்துதல் பற்றி படித்து மலைத்துப் போயிருந்ததால் இதிலும் அப்படிப்பட்ட அனுபவம் கிடைக்கப்பெறலாம் என்ற ஆசையில் இப்புதகத்தை எடுத்தேன்...

விகடனில், 'புதுப்பொலிவு (ஆக்சுவலி பழைய க்ளாசிக் லுக்கில்) பொன்னியின் செல்வனை' காண ஆவலுடன் உள்நுழைந்து ஆவலாக எடுத்துப் பார்த்தேன். மணியம் படங்களுடன் பார்க்கவே அட்டகாசமாக இருந்தது. விலை. 1200 ரூபாய் (டிஸ்கவுண்ட் போக 5 பாகங்களும் சேர்த்து). என்னதான் இருந்தாலும், கல்கியிலிருந்து வாராவாரம் பக்கங்கள் கிழித்து சேகரித்து பைண்டிங் செய்து என் நண்பர் கணேஷ்ராம் கொடுத்த அந்த பழைய லுக்-ஐ அடித்துக் கொள்ள முடியாது... கொடுமை என்னவென்றால், இப்புத்தகத்தை கண்ணால் கண்டபோதும் வாங்க முடியவில்லை... காரணம், ஆன்லைனில் முன்னமே நான் பணம் செலுத்தி பதிவு செய்திருந்தேன். ஆனால், புத்தகம் இன்னும் எனக்கு வந்து சேரவில்லை, கேட்டதற்கு 'வந்துவிடும் சார்... ஒரு நாளைக்கு 300 புத்தகம் டெலிவரி செய்து கொண்டிருக்கிறோம், பொறுமையாய் இருங்கள் ப்ளீஸ்.. ' என்று விடையளித்தார்கள்... நான் கண்காட்சிக்கு முன்னமே வாங்கிவிடலாம் என்றெண்ணி பதிவு செய்தது தவறாய்ப் போய்விட்டது... கண்காட்சியிலேயே வாங்கியிருந்தால் 150 குறைவாகவும் (ஆன்லைனில் 1350 ரூபாய்), விரைவாகவும் கிடைத்திருக்கும்...

இதோ படித்துவிட்டு தந்துவிடுகிறேன்... என்று போன முறை சில புத்தகங்களை என்னிடமிருந்து வாங்கிச் சென்ற நண்பர்கள் திருப்பித் தராமல் நட்பின் அடையாளமாய் வைத்துக் கொண்டதில் என் கலெக்ஷனில் சில புத்தகங்கள் மீண்டும் தேவைப்பட்டது... அவற்றையும் தேடிப்பிடித்தேன் மதனின் 'மனிதனும் மர்மங்களும்', 'கி.மு.கி.பி.', 'ஹாய் மதன் கேள்வி பதில்கள் பாகம் 1, 2, 3, 4, 5', செழியனின் 'உலக சினிமா 1, 2, 3(புதிது)'... பிறகு வாலி அவர்களின் அட்டகாசமான 'நினைவு நாடாக்கள்' முழுப்புத்தகமாய் கிடைத்தது.

விகடனிலிருந்து வெளியேறியதும் செக்யூரிட்டிகள் விசிலடிக்க ஆரம்பித்துவிட்டார்கள்... கடையை மூடுமாறு ஸ்பீக்கரில் அறிவிப்பு கேட்க தொடங்கியது...

ஓடோடிச் சென்று குமுதம் ஸ்டாலுக்குள் நுழைந்தேன்...

வழியில் கண்ணில் சிக்கிய, நான் போக நினைத்த உயிர்மை, கிழக்கு, டிஸ்கவரி, வனிதா பதிப்பகம், நன்னூல்.காம் போன்ற ஸ்டால்கள் ஒவ்வொன்றாய் மூடிக்கொண்டிருந்தார்கள்...

நல்ல வேளை, குமுதம் சில நபர்களுடன் திறந்தேயிருந்தது... 'பெ. கணேஷ்' புத்தகங்கள் வேண்டும் என்று கேட்டதும், 'சித்தர் சுவாமிகள்', 'A to Z டெக்னிக்கல் ரகசியம்', 'ங்ஙகா... சிறுகதைத் தொகுப்பு' மூன்றும் வாங்கிக் கொண்டதும்... விசில் சத்தத்துக்கு நடுவே வெளியேறினோம்...

வெளியேறியதும், நான் வாங்க நினைத்து மறந்த இன்னும் பல புத்தகங்கள் கண்முன் வந்து மறைந்தன... நிச்சயம் மீண்டும் வர வேண்டும்...

பின்குறிப்பு : எனது மொபைலில் மெமரி கார்டு பிரச்சினை என்பதால் ஃபோட்டோ எடுக்க முடியவில்லை...

அன்புடன்

ஹரீஷ் நாராயண்

அம்புலி 3D : புத்தாண்டு மேஜிக் போஸ்டர்

2012-01-02T11:34:00.000+05:30

வணக்கம்,

கடினங்களை கடந்த வருடமே கடந்துவிட்டதால்...
இனி வரும் இந்த புதிய வருடம்...
இனிமைகளை வாரி இரைத்திட...
அனைவருக்கும் இனிய புத்தாண்டு நல்வாழ்த்துக்கள்...

எனது பள்ளிக்காலத்தில் ஒருமுறை எங்கள் பள்ளிக்கு வந்த கிறித்துவ மத நண்பர்கள், கையில் ஒரு துண்டுபிரச்சார சீட்டை கொடுத்தார்கள்... அதில் கருப்பு வெள்ளையின் கலவையில் ஒரு டிசைன் இருந்தது... அதை 30 விநாடிகள் உற்றுப்பார்த்துவிட்டு வானத்தை பார்க்கும்படி போட்டிருந்தது... அப்படி செய்ததும் துண்டு சீட்டில் நாம் பார்த்த அந்த டிசைன் வானத்தில் இயேசு கிறித்துவாய் தெரியும்... இதைப்பார்த்தும் நானும் எனது நண்பர்களும் மலைத்துப் போனோம்...

அடடே..! வானத்தில் இயேசு தெரிகிறார் என்று கொண்டாட ஆரம்பித்தோம். அன்று அந்த துண்டுச்சீட்டுக்கு அப்படி ஒரு டிமாண்ட் இருந்தது... அனைவரும் வீட்டிற்கு கொண்டு போய் பெற்றோர்களிடமும் அதைக் காட்டி அவர்களையும் ஆச்சர்யப்படுத்தினோம்... சுமார் ஒரு வாரத்திற்கு பள்ளியில் இதே பேச்சாய் இருந்தது...

இதுதான் அந்த டிசைன்...

இன்று அப்படிப்பட்ட இல்யூஷன் வகை டிசைன்களை இண்டர்நெட்டிலும் நிறைய காணக்கிடைக்கிறது... ரஜினிகாந்த், ஐஸ்வர்யா ராய், பின் லேடன், ஒபாமா... இப்படி பல பிரபலங்களின் முகங்களை இந்த வகை இல்யூஷன் டிஸைன்களில் நீங்களும் ஃபேஸ்புக்கில் கண்டிருக்கலாம்...

அந்த வகையில், அம்புலி படத்திற்கு ஒரு டிசைன் செய்ய எண்ணி செயல்படுத்தியிருக்கிறோம்... நேற்றைய புத்தாண்டு சிறப்பு டிசைனாக தமிழ் நாளிதழ்களில் வெளியான டிசைன் இதோ உங்கள் பார்வைக்கு...

தமிழ் நாளிதழ்களில் அம்புலி புத்தாண்டு சிறப்பு டிசைன்

டிசைனைப் பார்த்துவிட்டு உங்கள் கருத்துக்களை தெரிவிக்கவும்...

அன்புடன்

ஹரீஷ் நாராயண்

'அம்புலி 3D' : முதல் ட்ரெய்லர்

2011-12-25T18:38:00.000+05:30

வணக்கம் நண்பர்களே,

அம்புலி படத்தின் டீசர் ட்ரெய்லரை இப்பதிவுடன் இணைத்துள்ளேன். பார்த்துவிட்டு உங்கள் கருத்தை தெரிவிக்கவும்...

AMBULI FIRST TEASER

அன்புடன்
ஹரீஷ் நாராயண்

சந்திர கிரகணம் 2011

2011-12-10T21:18:00.006+05:30

இன்று மாலை நிகழ்ந்த சந்திர கிரகணத்தை, 'அம்புலி 3D' குழுவினர்கள் சேர்ந்து எங்கள் அலுவலக மாடியில் கண்டு களித்தோம். கேமிராமேன் சதீஷ், இன்று நிகழ்ந்த கிரகணத்தை 'ஸ்டாக் ஷாட்'டாக வைத்துக் கொள்வதற்காய் ஷூட் செய்து கொண்டிருந்தார். சுற்றிலும் நின்றிருந்த நாங்கள் ஒவ்வொருவரும் கிரகணத்தைப் பற்றிய அவரவர் கருத்துக்களை பகிர்ந்து கொண்டிருந்தோம்

அறிவியல் ரீதியாய் அதற்கு ஆயிரம் அர்த்தம் கூறினாலும், எனக்கு கிரகணத்தை பார்த்து சிலாகிக்கும்போது, சிறுவயதில் என் தாத்தாவிடம் கேட்ட சந்திரமண்டல கதைகள் நினைவுக்கு வந்துக் கொண்டிருந்தன... இது போன்ற ஸ்பேஸ் ஃபேண்டஸி ரசத்துடன் கூடிய நம்மூர் பழங்கதைகளுக்கு(ம்) என்னை ரசிகனாக்கிய என் தாத்தா கண்டிப்பாக மேலிருக்கும் நட்சத்திரங்களின் நடுவே ஜொலித்துக் கொண்டிருப்பார் என்று அறிவியல் அறிவை தோற்கடித்து நம்பத்தூண்டுகிறது என் நெஞ்சம்.

முன்பெல்லாம் நிலாச்சோறுக்கு அடிக்கடி கூடும் குடும்பக் கூட்டம்...

அரிதாய் தோன்றும் கிரகணத்தை காண அவரவர்வீட்டு மாடியில் கூடியிருந்தது...

தூரத்து மாடியில் எஃகோ எஃபெக்டில் கேட்கும் முகம்தெரியா குழந்தைகளின் குதூகலக்குரல் கிரகணத்துக்கு மேலும் கிராக்கி கூட்டிக்கொண்டிருந்தது...

தியேட்டரில், படத்தின் நடுவே கரண்ட் கட் ஆவதுபோல்...

கிரகணத்தை ஆழ்ந்து ரசிக்கும்போது குறுக்கே வந்து தொலைத்த மேகத்திரளை திட்ட மனம் வரவில்லை...

தோன்றி... மறைந்து... பின்தோன்றும் இந்த மாயை...

இயற்கை, சிலமணித்துளிகளே வானில் நிகழ்த்தும் கிராஃபிக்ஸ் காட்சி...

கிரகணம்...

அன்புடன்

ஹரீஷ் நாராயண்

'அம்புலி 3D' : அமுதனின் டைரி... (பக்கம் 3)

2011-11-20T15:38:00.002+05:30

அமுதன் வாசித்த புல்லாங்குழல் மெட்டு இதுதான்...

CLICK HERE FOR AMUDHAN'S LOVE FLUTE

'அம்புலி 3D' : அமுதனின் டைரி... (பக்கம் 2)

2011-11-15T09:32:00.000+05:30

அமுதனின் டைரியில் பக்கம் 2ல் எழுதியிருந்தது...

'அம்புலி 3D' : அமுதனின் டைரி...

2011-11-14T09:43:00.000+05:30

அன்பு நண்பர்களுக்கு வணக்கம்...
இந்த வாரத்திலிருந்து அம்புலி படத்தில் வரும் ஹீரோ கதாபாத்திரமான அமுதன் எழுதிய டைரியை இன்று முதல் ரிலீஸ் வரை தினமும்...அனைத்து சமுதாய வலைத்தளங்களிலும் பகிரலாம் என்று முடிவு செய்தோம்... இதோ உங்களுக்காக...

உங்கள் மேலான கருத்துக்களை பகிரவும்...

அன்புடன்
ஹரீஷ் நாராயண்

"அம்புலி 3D" ஷூட்டிங் ஆல்பம் - பகுதி 2

2011-11-05T16:58:00.000+05:30

புகைப்படம் #008

எடுத்த நாள் : February 12, 2011

இந்த புகைப்படம் KTVR கல்லூரியில் நள்ளிரவு படப்பிடிப்பின்போது எடுக்கப்பட்டது... ரேடியோவில் கேட்கும் எம்.ஜி.ஆர். பாடலை ('ஒரு பெண்ணை பார்த்து நிலவைப் பார்த்தேன்...') நாயகன் அஜய் கேட்டு நடனமாடுவது போன்ற காட்சியமைப்பு... உற்சாகமான பாடலென்பதால் அனைவரும் தூக்கத்தையும் களைப்பையும் மறந்து செயலாற்ற அப்பாடல் உதவியாக இருந்தது...

------------------------------

புகைப்படம் #009

எடுத்த நாள் : March 09, 2011

நாயகன் அஜய் சைக்கிளில் 3D ரிக் சங்கதிகளை மாட்டிக்கொண்டு வண்டி ஓட்ட ஆயத்தமானபோது எடுக்கப்பட்ட புகைப்படம்...

------------------------------

புகைப்படம் #010

எடுத்த நாள் : April 14,, 2011

'குட்டுப்பட்டாலும் மோதிர கையால் குட்டுப்பட வேண்டும்' என்று சொல்வார்கள்... இந்த காட்சியில் நாயகன் ஸ்ரீஜித். நடிகர் திரு.தம்பி ராமையா அவர்களிடம் அறை வாங்குவது பல ரீடேக் எடுக்கபட்டபோது எடுத்த புகைப்படங்களின் தொகுப்பு...

------------------------------

புகைப்படம் #011

எடுத்த நாள் : March 04, 2011

நடிகை உமா ரியாஸ் மேடம் , 40 அடி க்ரேனில் மேலே ஏற வேண்டும் என்ற தனது நீண்ட நாள் ஆசையை கேமிராமேனிடம் தெரிவிக்க... படப்பிடிப்பின் ஓய்வுநேரத்தில் நிறைவேற்றப்பட்டபோது எடுக்கப்பட்ட புகைப்படம்.

------------------------------

புகைப்படம் #012

எடுத்த நாள் : February 16, 2011

நடிகை கலைராணி மேடம், இரகசியங்களை காலம்காலமாக சுமக்கும் ஒரு சீமாட்டி என்ற மூதாட்டியின் கதாபாத்திரத்தில் நடித்தப்போது எடுக்கப்பட்ட புகைப்படம்... க்ளாப் அடிப்பவர் உதவி இயக்குநர் உசேன்... பின்னால் கருப்பு சட்டையில் நடிகர் ஜெகன்... மற்றும் ஸ்ரீஜித் அஜய் (மறைவாய்)

------------------------------

புகைப்படம் #013

எடுத்த நாள் : March 17, 2011

கலை இயக்குநர் ரெமியன் அவர்கள், ஒரு ஊதுபத்தி தொழிற்சாலை செட் போட்டு முடித்த சந்தோஷத்தில் இருந்தபோது எடுக்கப்பட்ட புகைப்படங்களின் தொகுப்பு... அருகில் தொப்பி போட்டு நடப்பவர் துணை கலை இயக்குநர் அஷோக் அவர்கள்....

------------------------------

புகைப்படம் #014

எடுத்த நாள் : February 02, 2011

கலை இயக்குநரின் மற்றுமொரு கலைவெளிப்பாடாய் இந்த மரவீடு செட்... இத்தனை பேரின் பாரத்தை தாங்கியபடி சற்றே உயரத்தில் கட்டப்பட்ட செட்... நானும் (ஹரீஷ் நாராயண்) நண்பர் ஹரியும் மாணிட்டரை பார்த்தபடியிருக்க, பின்னனியில் படக்குழுவினர் அடுத்த காட்சிக்கு ஆயத்தமாகிக் கொண்டிருந்தபோது எடுக்கப்பட்ட புகைப்படம்...

(தொடரும்)

"அம்புலி 3D" ஷூட்டிங் ஆல்பம் - பகுதி 1

2011-10-17T23:41:00.000+05:30

அம்புலி 3D திரைப்படத்தளத்தில் எடுத்த சில புகைபடங்களை, அவற்றை எடுக்கும்போது நடந்த சுவாரஸ்ய தகவல்களை எழுதி பகிர்ந்து கொள்ள விரும்புகிறேன்..!

புகைப்படம் #001

எடுத்த நாள் : February 08, 2011

ஒரு பாடல் காட்சியின் படப்பிடிப்பில் இடைவேளையின்போது எடுத்த புகைப்படம்... நடனக்கலைஞர் சந்தியா அபிநயம் பிடிக்கும் முறையை நடிகை சனம் அவர்களுக்கு சொல்லிக்கொடுக்கிறார்...

------------------------------------------------------------------------

புகைப்படம் #002

எடுத்த நாள் : February 11, 2011

(இடம்) : துணை இயக்குநர் தினேஷா நடித்துக்காட்டுகிறார்

(வலம்) : நடிகை உமா ரியாஸ் அவர்கள்... குழந்தை நட்சத்திரம் ஃபாஸில்-உடன் சேர்ந்து நடிக்கும்போது எடுத்த புகைப்படம்

------------------------------------------------------------------------

புகைப்படம் #003

எடுத்த நாள் : February 10, 2011

ஒளிப்பதிவாளர் சதீஷ். ஜி சுமார் 100 அடி உயரத்திலிருந்து ஒரு அபாயகரமான காட்சி ஒன்றை படம்பிடிக்கும்போது எடுத்த புகைப்படம்
------------------------------------------------------------------------

புகைப்படம் #004

எடுத்த நாள் : February 11, 2011

இடைவேளையில்... உதவி இயக்குநர்கள் குழு ஒன்றுகூடி எடுத்துக்கொண்ட புகைப்படம்...

பின்னனி குரல் : 'ஷாட் ரெடி... அஸிஸ்டெண்ட்ஸ்லாம் எங்கப்பா போய் தொலஞ்சீங்க...? ஒருத்தரையும் காணோம்...!'
------------------------------------------------------------------------

புகைப்படம் #005

எடுத்த நாள் : April 15, 2011

'ராக் & ரோல்' பாடல் படப்பிடிப்பின்போது டான்ஸ் மாஸ்டர் தினாவும் அவரது உதவியாளர்களும் நடிகர்களுக்கு நடனப்பயிற்சியளித்த போது எடுத்த புகைப்படம்

------------------------------------------------------------------------

புகைப்படம் #006

எடுத்த நாள் : February 11, 2011

(இடது) படத்தின் 2 இயக்குநர்களில் ஒருவரான ஹரிஷங்கர், நடிகர் அஜய்-க்கு சைக்கிளை ஃப்ரேமில் எங்கு தொடங்கி எங்கு முடிக்க வேண்டும் என்று தடம் குறித்து காட்டியபோது எடுத்தது...

(வலது) பயிற்சிக்கு பிறகு நடிகர் அஜய், ஸ்ரீஜித்துடன் சைக்கிளில் தடம் மாறி சுவற்றில் முட்டிக்கொண்டபோது எடுத்த புகைப்படம்...

------------------------------------------------------------------------

புகைப்படம் #007

எடுத்த நாள் : April 25, 2011

இந்த காட்சி பாடலுக்கு இடையில் வரும் ஒரு இன்ஸர்ட்... காட்சிப்படி நடிகர் தம்பி ராமையா அவர்களுக்கு மாணவர்கள் தயிர் சாதம் ஊட்டிவிடுவது போல் எடுக்கவேண்டியது... சில எக்ஸ்ட்ரா டேக் வாங்கியபின் காட்சிமுடிந்து டின்னர் ப்ரேக் விடப்பட்டது.. 'தம்பியண்ணன்' (இப்படி நான் அவரை அழைப்பது வழக்கம்) அவர்களை சாப்பிட அழைத்தபோது 'அடப்போ தம்பி... அதான் பசங்க எல்லாம் போதுமானளவுக்கு ஊட்டிவிட்டுட்டாங்களே... எனக்கு டின்னரே வேண்டாம்...' என்று கூறிவிட்டார்...

மீண்டும் அடுத்த பகுதியில் சந்திக்கிறேன்.

அன்புடன்

ஹரீஷ் நாராயண்

ரயில் சிநேகம்...

2011-10-13T23:57:00.003+05:30

(Photo Courtesy : http://guide2chennai.blogspot.com)

நீண்ட நாட்களுக்குப் பிறகு கிட்டிய ரயில் பயணம்
ஜன்னலுக்கு வெளியே, நினைவுகளையும் பின்னுக்கு தள்ள
முப்பது நிமிட முத்துக்குளியலில்... முத்தாய் கிடைத்தன
சில ஞாபகங்கள்...

கல்லூரிக் கால பருவ மழையில் நண்பர்களுடன் செலவு செய்த
நட்பெனும் சில வருடங்களின் சில்லிடும் சாரல்கள்...

உண்டோம்...
உறங்கினோம்...
உறக்க கத்தினோம்...
காதலித்தோம்...
கானம் பாடினோம்...
காற்று வாங்கினோம்...
எப்போதாவது படித்தோம்...
முப்போதும் பழகினோம்...
வேற்றாரரையும் உற்றாராய் அணுகினோம்...
இப்படி நாங்கள் சில நிமிடங்கள் மட்டுமே சேர்ந்து வாழ்ந்த
வாடகை வீடு
ரயில்..!

இரண்டு கால்களும் தண்டவாளங்களாக
தலைக்குமேலே 'மாணவன்' என்ற மின்சாரக் கம்பி பாய்ச்சிய சக்தியில்
கைகள் கோர்த்து கொண்ட சந்திப்புகளாய் (ஜங்ஷன்)
நட்பெனும் பயணம் மேற்கொண்டோம்...

அவ்வப்போது கல்லூரி எனும் பணிமனையில் ஓய்வெடுத்திருந்தபோதிலும்
தொடர்வண்டியாய் தொடர்ந்தது எங்கள் பயணம்...
ஒரு சமயம் ரயிலிறங்கினோம்...
எதற்கு..?

ரயில் சுவற்றில் மட்டும் கிறுக்கிய எங்கள் பெயர்களை
வாழ்க்கை சுவடுகளும் சுவைக்கட்டும் என்று...

இப்படி அன்று வாழ்க்கையை சுவைக்க கற்றுத்தந்த ரயில்
இன்று எங்கள் நினைவுகளை சுமந்து எங்கள் நெஞ்சில் கனக்கிறது...

தடம்புரளா எங்கள் நட்பெனும் காதலின் நினைவுச் சின்னம்
ரயில்..!

அன்புடன்
ஹரீஷ் நாராயண்

அம்புலி 3D பாடல்கள்...

2011-08-21T21:05:00.000+05:30

அம்புலி 3D திரைப்படத்தின் இசை வெளியீட்டு விழா மிகச்சிறப்பாக நடந்தேறியது. என்னுடன் படித்த பள்ளி நண்பர்களும், கல்லூரி நண்பர்களும், உடன் வேலைசெய்த நண்பர்களும் வந்திருந்தனர். வலையுலக நண்பர்களில் 'கேபிள் சங்கர்' சில பதிவர்களுடன் வந்திருப்பதாக தெரிவித்தார். வந்திருந்து வாழ்த்திய அத்தனை நல்லுள்ளங்களுக்கும் மனமார்ந்த நன்றி..!

விழா நடந்தேறிய விதத்தையும் புகைப்படத்தையும் பிறகு பதிகிறேன்..! முதலில் செவிக்கு உணவு...

அம்புலி திரையிசை பாடல்களை உங்களுடன் பகிர்ந்து கொள்வதில் மகிழ்ச்சியடைகிறேன். கேட்டுவிட்டு உங்களது கருத்துக்களை தெரிவிக்கவும்.

01. HAPPY FAREWELL DAY
பாடகர்கள் : பென்னி தயாள், பாப் ஷாலினி, S ரஷ்மிதா, ப்ரியங்கா
பாடல் : நா. முத்துக்குமார்
இசை : மெர்வின் சாலமன்

அம்புலி படத்தின் 4 இசையமைப்பாளர்களில் இந்த பாடலுக்கு இசையமைத்த மெர்வின் சாலமன் எங்கள் குழுவுக்கு புதியவர், நால்வரில் இளையவர். 'பொறியல்' என்ற RockBand நடத்தி வரும் இளைஞர்.கல்லூரியில் இறுதியாண்டு படித்துக் கொண்டிருந்த மெர்வினை ஒரு RockBand நிகழ்ச்சியில் சந்தித்து தேர்வு செய்தோம்.இந்த பாடலை அவர் கம்போஸ் செய்யும்போது, கல்லூரியில் அவருக்கு இறுதியாண்டு தேர்வு நடைபெற்று கொண்டிருந்தது. பாவம்... புத்தகத்தையும், கீ-போர்டையும் ஒன்றாக வாசிக்க வேண்டிய கட்டாயம்... ஆனால் பாடப்பரீட்சையில் வெற்றி பெற்றுவிட்டார், பாடல் பரீட்சையில் வெற்றி பெற்றிருக்கிறாரா என்று நீங்கள் கேட்டுப் பார்த்து சொல்லுங்கள்...

---------------------------------------------------------

02. நெஞ்சுக்குள்ள யாரு....
பாடகர்கள் : கார்த்திக், சின்மயி
பாடல் : கவிஞர் தாமரை
இசை : சாம் C.S.

இந்த பாடலின் இசையமைப்பாளர் சாம் C.S. எங்கள் நீண்ட நாளைய நண்பர், கலையம்சத்தில் பன்முகம் கொண்டவர். எனக்கு முதலில் பாடலாசிரியரென அறிமுகமானாலும் அவர் இசையில் வல்லவர் என்பது அவர் இசையமைத்த "14 For Teen" என்ற ஆல்பம் மூலமாக உணர்ந்தேன். மெலோடி பாடல்கள் இவரது ஸ்பெஷாலிட்டி. அம்புலியில் இனிமையான ஒரு செமி ஃபேன்டஸி மெலோடியை அவரிடம் கேட்டபோது அவர் இசைத்து கொடுத்த பாடல்தான் இந்த 'நெஞ்சுக்குள்ள யாரு...'

---------------------------------------------------------

03. மழைக்காடே... மணல்மேடே....
பாடகர்கள் : மதுபாலகிருஷ்ணன்
பாடல் : நெல்லை ஜெயந்தா
இசை : K. வெங்கட் பிரபு ஷங்கர்

இந்த பாடலுக்கு இசை வெங்கட் பிரபு ஷங்கர் (நண்பர் ஹரியின் தம்பி)... இவர் இளையராஜா சாரின் தீவிர ரசிகர். அம்புலி படத்தின் பின்னனி இசையில் ஒரிஜினல் ஸ்கோர் இவர்தான். எனவே, கதையினூடே வரும் ஒரு சந்தர்ப்பத்தில் கிராமத்து மக்களின் ஒட்டுமொத்த வலியை பிரதிபலிக்கும் பாடலான இந்த 'மழைக்காடே மணல்மேடே' பாடலை இவரே இசையமைத்து பாடல் வடிவம் கொடுத்தார்... கேட்டுப்பாருங்கள்.. எப்படியாவது இவரது பாடலை இளையராஜா சாரிடம் போட்டு காட்டி கருத்து கேட்க வேண்டும் என்பது எங்கள் குழுவினரின் உள்ளாசை... அவரிடம் கேட்கும்போது கேட்டுக் கொள்ளலாம். இப்போது நீங்கள் கேட்டுவிட்டு கருத்து சொல்லுங்கள்

---------------------------------------------------------

04. சந்திரன சூரியன....
பாடகர்கள் : விஜய்பிரகாஷ்
பாடல் : நா. முத்துக்குமார்
இசை : சதீஷ்

சதீஷ்... இவரை சில வருடங்களுக்கு முன்பு சந்திக்கும்போது 'ஐயப்பன் பக்தி பாடல்களை வெளியிட முயன்று கொண்டிருந்தார். அவர் வைத்திருந்த ட்யூன்கள் மிக அருமையாக இருந்து. எனது முதல் குறும்படமான 'இராமன் எஃபெக்ட்'-ற்கு இவர்தான் சிறப்பாக இசையமைத்து கொடுத்தார். அதன்பிறகு 'ஓர் இரவு', இப்போது 'அம்புலி'யில் முக்கியமான ஒரு கூட்டுப்பிரார்த்தனை பாடலுக்கு இசையமைத்திருக்கிறார். எந்த ஒரு கடவுளையும் குறிப்பாக சொல்லாமல் பொதுவாக ஆதிசக்தியை வணங்குவது போன்ற ஒரு பாடல் இது. இந்த பாடல் படப்பிடிப்பின் போதுதான் கிலியான சில அனுபவங்கள் ஏற்ப்பட்டது என்று எனது படப்பிடிப்பு அனபவத்தில் எழுதியிருக்கிறேன்.

---------------------------------------------------------

05. Rock'N Roll
பாடகர்கள் : ரஞ்சித், பாப் ஷாலினி
பாடல் : நா. முத்துக்குமார்
இசை : சாம் C.S.

70-களில் ஈஸ்ட்மென் கலரில் பார்க்கும் சில பாடலை போன்ற ஜாலியான பாடலிது. கவிஞர் நா.முத்துக்குமார் அவர்கள் மிகவும் ரசித்தபடி எழுதி கொடுத்தார். இசையமைப்பாளர் சாம், இந்த பாடலில் 70களில் ஸ்டைலில் விசில், பியானோ, ட்ரம்ஸ் என்று உபயோகித்து வாசித்து கொடுத்தார். குறிப்பாக பாடலுக்கு நடுவில் வரும் ஒரு பியானோ ரன்னிங்-ஐ பலமுறை ப்ராக்டீஸ் செய்து, ஒரு நள்ளிரவில் வாசித்து காட்டினார். அதை அவர் வாசிப்பதை பார்த்தாலே டான்ஸ் ஆடுவது போலிருக்கும்... எனவே, இது நிச்சயமாக கேட்பவர்களை ஆடத்தூண்டும் என்ற நம்பிக்கையில்.... இதோ...

---------------------------------------------------------

06. ஆத்தா நீ பெத்தாயே....
பாடகர்கள் : தஞ்சை செல்வி
பாடல் : நெல்லை ஜெயந்தா
இசை : K. வெங்கட் பிரபு ஷங்கர்

தூங்க வைப்பதற்கு பாடப்படும் தாலாட்டு பாடலை சற்றே மாற்றி 'தூக்கம் தொலைத்து மிரட்சியில் படுத்திருக்கும்' ஒரு கிராமத்து மக்களுக்காக, ஒரு வயதான மூதாட்டி பாடுவதை போன்ற பாடல் இது. இதை 'பாட்டியின் புலம்பல்' என்றும் கூறலாம். இப்பாடலுக்கு இசை K. வெங்கட் பிரபு ஷங்கர், இந்த பாடலுக்காக இவர் ஏற்கனவே 2 ட்யூன்களை இசைத்து வைத்திருந்தார். ஆனால், அவை போதாமல் இன்னும் தேவை தேவை என்று நாங்கள் கேட்டுக் கொண்டிருக்கவே, ஒரு நாள் (சற்றே) கோபமாக, இரவு வேளையில் சுமார் 2 மணி நேரத்திற்குள் இந்த பாடலுக்கான ட்யூனையும் முடித்து, அதற்குமேல் சிறப்பு சப்தங்களை சேர்த்து அலங்கரித்து காட்டினார். அது மிகவும் திருப்திகரமாக அமைந்தது. பாடலை 'ஈசன்' புகழ் 'தஞ்சை செல்வி' அவர்கள் உணர்ந்து பாடிக் கொடுத்தார். பாடலுக்கேற்ற முகபாவங்களுடன் மிகவும் சிறப்பாக கலைராணி மேடம் நடித்து கொடுத்தார்.

---------------------------------------------------------

07. Theme of AMBULI
இசை : K. வெங்கட் பிரபு ஷங்கர்

படம் வெளியாவதற்கு முன் ஒரு படத்தின் கதையை பொதுவாக வெளியில் சொல்லமாட்டார்கள். ஆனால், இசையமைப்பாளர் பிரபு தைரியமாக இந்த அம்புலியின் கதையை இசைவடிவில் தீம் மியூஸிக்காக சொல்லியிருக்கிறார். நல்லவேளை வார்த்தையாக விளங்கி கொள்ள முடியாது என்றாலும் இசை மொழியில் சொல்லப்பட்டதால் உணர்வாய் உணர்ந்து கொள்ளுங்கள்...

---------------------------------------------------------

08. 3D ERA
பாடகர்கள் : நரேஷ் ஐயர், ப்ளாஸி
பாடல் : ப்ளாஸி & அம்புலி டீம்
இசை : சதீஷ்

அம்புலி, தமிழ் சினிமாவில் முதல் முழுநீள 3D டிஜிட்டல் திரைப்படம் என்பதை பிரகடனப்படுத்தும் வகையில் அமைந்த கொண்டாட்டமான இந்த பாடல் கடைசி நிமிடத்தில் முடிவாகி ஆடியோ வரிசையில் சேர்க்கப்பட்டது. ஆனால், பாடலில் அந்த கடைசி நேர அவசரம் தெரியாதபடி மேன்மை தீட்டியவர் இசையமைப்பாளர் சதீஷ். இந்த பாடலை எங்களால் மறக்கவே முடியாது. காரணம், ஒரு நாள் டின்னர் முடித்துவிட்டு இரவு வேளையில் அலுவலகத்தில் அம்புலி குழுவினர்கள் அனைவரும் கும்பலாக அமர்ந்து இந்த பாடலுக்கான தமிழ் வரிகளை கூவி கூவி பாடிப்பார்த்து எழுதினோம் (பாவம் அபார்ட்மெண்ட்-ல் தூங்கிக் கொண்டிருந்தவர்கள்). 'நன்றாக வந்துள்ளதோ..?' என்ற சின்ன நம்பிக்கை பிறந்ததுமே சேவல் கூவியது. பேனா மூடி மூடப்பட்டது. 'நரேஷ் ஐயர்' குரலில் குதூகலம் கொஞ்ச,. ஆங்கில வரிகளை 'ப்ளாஸி' எழுதியும் பாடியும் பாடலை பிரமாதப்படுத்திவிட்டார்கள்.

---------------------------------------------------------

எட்டு பாடல்களும் கேட்டுவிட்டு மறக்காமல் உங்கள் கருத்துக்களை பகிர்ந்து கொள்ளுங்கள். உங்களுக்கு பிடித்த பாடலை உங்கள் நண்பர்களோடும் பகிர்ந்து கொள்ளுங்கள்...

அடுத்த பதிவில் சந்திக்கிறேன்.

நட்புடன் இணைந்திருப்போம்..! நன்றி வணக்கம்..!

அன்புடன்

ஹரீஷ் நாராயண்

Songs Courtesy : www.raaga.com
Source : http://www.raaga.com/channels/tamil/moviedetail.asp?mid=T0003125

இன்று "அம்புலி 3D" இசை வெளியீடு LIVE ON WEB...

2011-08-19T12:01:00.000+05:30

நண்பர்களுக்கு வணக்கம்,

போஸ்ட் ப்ரொடக்ஷன் வேலைகள் முழுவீச்சில் நடந்து வருவதாலும், ஆடியோ வெளியீடு குறித்த வேலைகள் அதிகமாக இருப்பதாலும், தொடர்ந்து பதிவு எழுத முடியவில்லை..! இன்று 'அம்புலி 3D' இசை வெளியீடு... சென்னை காமராஜர் அரங்கத்தில் மாலை 6 மணிக்கு நடைபெற உள்ளது...

நேரில் கலந்து கொள்ள முடியாத வெளிநாட்டு நண்பர்களும் மற்றும் உள்நாட்டு நண்பர்களும் இசை வெளியீட்டு விழாவை கண்டு களிப்பதற்காக இணையதளத்தில் நேரலை ஒளிபரப்புக்கு ஏற்பாடு செய்துள்ளோம். கண்டிப்பாக பார்த்து உங்கள் கருத்துக்களை பகிரவும்.

AMBUILI 3D LIVE AUDIO LAUNCH LINKS

WWW.AMBULI3D.COM
WWW.FACEBOOK.COM/AMBULI3D
WWW.CHENNAIONLINE.COM

அன்புடன்
ஹரீஷ் நாராயண்

நடிகர் ஆர்யா அம்புலி 3D வெப்ஸைட் துவக்கி வைத்தார்..!

2011-07-23T18:35:00.004+05:30

PLEASE VISIT WWW.AMBULI3D.COM FOR "AMBULI 3D"s OFFICIAL WEBSITE

கடந்த வெள்ளிக்கிழமையன்று நடிகர் ஆர்யா அவர்கள் "அம்புலி 3D" திரைப்படத்தின் இணையதளத்தை துவக்கி வைத்தார். இணையதளத்தை முழுவதுமாக பார்த்துவிட்டு கருத்து தெரிவித்தார்.

நெற்றியில் ஒரு சின்ன வெட்டுக்காயம் என்றாலும், பார்க்க அழகான ஹாரிபாட்டர் போலவே தெரிந்தார்.

படத்தின் சில காட்சிகளையும், ட்ரெய்லரையும் பார்த்துவிட்டு "நல்ல முயற்சி நன்றாக உள்ளது" என்று பாராட்டினார்.

அவர் அம்புலி திரைத்தளத்தை துவக்கி வைத்த காணொளி இதோ...

இணையதளத்தை பார்த்துவிட்டு உங்கள் மேலான கருத்துக்களை தெரிவிக்கவும்.

அன்புடன்

ஹரீஷ் நாராயண் (DREAMER)

'அம்புலி 3D' படக்குழுவினர்களுக்காக 'ஓர் இரவு' சிறப்புக் காட்சி

2011-07-19T18:24:00.000+05:30

எங்கள் குழுவின் முதல் படமான 'ஓர் இரவு' திரைப்படத்தை 'அம்புலி 3D' டீம் பார்ப்பதற்காக பிரத்யேக காட்சி ஒன்றை சென்ற வெள்ளிக்கிழமை இரவு 9 மணிக்கு, தேவி ஸ்ரீ தேவி ப்ரிவியூ தியேட்டரில் ஏற்பாடு செய்திருந்தோம்.

↑ 'ஓர் இரவு' இயக்குனர்கள்

ஹரி ஷங்கர், ஹரீஷ் நாராயண், கிருஷ்ண சேகர்

'அம்புலி 3D' குழுவினரில் சுமார் 60% ஆட்கள் வந்திருந்து சிறப்பித்தனர். மீதமிருந்த நண்பர்கள் தத்தம் பணியில் வெளியூர்களில் சிக்கிக்கொண்டதாக தெரிவித்தனர்.

படத்தை பார்த்து பாராட்டியதோடு பலரும் 'ஏன் இந்த படத்துக்கு நீங்கள் சரியாக பப்ளிசிட்டி செய்யவில்லை..! ஏன் A சென்டர் தியேட்டர்களில் திரையிடவில்லை' என்று ஏகத்துக்கும் திட்டி தீர்த்தனர். கண்டிப்பாக 'ஓர் இரவு' படத்தை ரீ-ரிலீஸ் செய்யும்படி அறிவுறுத்தி சென்றனர்.

↑ டான்ஸ் மாஸ்டர் தினா அவர்களுடன்

↑ ஸ்டண்ட் மாஸ்டர் T.ரமேஷ் அவர்களுடன்

↑ திரு. டேனியல் ப்ரொடக்ஷன் மேனேஜர் சக்தி அவர்களுடன்

↑ அண்ணன் தேனி முருகன் & ப்ரொடக்ஷன் எக்ஸிக்யூடிவ் சந்தனபாண்டியன் அவர்களுடன்

↑ கோகுல் மற்றும் நண்பர்கள்

↑ உமா ரியாஸ்

↑ மேக்கப் சசி (நடுவில் இருப்பவர்) அவர்களுடன்

↑ காஸ்ட்யூமர் பாபு (குழந்தையுடன்)

↑ லைட் டிபார்ட்மெண்ட் ஷக்தி (ப்ரௌன் ஷர்ட்)

குறிப்பாக சொல்லவேண்டுமென்றால், சிறப்பு காட்சியில் கலந்து கொண்ட IOB-ல் பணிபுரியும் திரு. ஜெயப்பிரகாஷ் அவர்கள், படத்தை பார்த்த அடுத்த நாள் எனக்கும் ஹரிக்கும் கான்ஃபரன்ஸ் கால் போட்டு நீண்ட நேரம் பேசி பாராட்டி கொண்டிருந்தார். படத்தை பார்த்து பயந்த அவரது இன்ஜினியரிங் படிக்கும் மகன், இரவு 1.30 மணியளவில் கதவு தட்டி அப்பா அம்மாவுக்கு நடுவில் படுத்து கொண்டதாக கூறினார். இப்படம் சரியான ஆடியன்சுக்கு போய் சேர்ந்திருந்தால் இது கண்டிப்பாக ஒரு மாற்றத்தை ஏற்படுத்தியிருக்கும், எப்படியாவது ரீரிலீசுக்கு முயலுங்கள் என்று வற்புறுத்தினார். 70களில் அன்னக்கிளி படத்தை முதலில் ஏற்றுக்கொள்ளாத மக்கள் பிறகு அந்த படத்தையும் இசையையும் கொண்டாடியதை உதாரணம் கூறினார். அவருக்கு இப்பதிவின் மூலம் எனது குழுவினர் சார்பாக நன்றி தெரிவித்து கொள்கிறேன்.

நாங்களும் அந்த எண்ணத்தில் (ரீ-ரிலீஸ்) இருப்பதால்தான் இப்படம் குறித்த எந்த உரிமையையும் இன்னும் எவ்விடத்திலும் வியாபாரப்படுத்தாமல் வைத்திருக்கிறோம்.

↑ IOB ஸ்டாஃப் நண்பர்கள்

↑ மற்றும் நண்பர்களின் குடும்ப நபர்கள்

இந்த பிரத்யேக காட்சி, 'அம்புலி 3D'படப்பிடிப்பில் உடன் பணியாற்றிய அத்தனை நண்பர்களையும் மீண்டும் சந்திக்கும் ஒரு get togetherஆக அமைந்ததில் அனைவருக்கும் மகிழ்ச்சி..!

"தமிழ் டைஜஸ்ட்" வழங்கும் கவிதைப் போட்டி

2011-07-14T18:48:00.001+05:30

வணக்கம் நண்பர்களே..!

சமீபத்தில் எனது நண்பர்கள் ஆக்கத்தில் உருவான 'தமிழ் டைஜஸ்ட்' என்ற ஆங்கிலம் வழி தமிழ் பயிற்சி-யைப் பற்றி தெரியவந்தது. இந்த பயிற்சி முறையில், ஆங்கிலம் தெரிந்த யாரும் தமிழை எளிதில் படித்து தெரிந்து கொள்ளும் வண்ணம் பாடதிட்டங்கள் வடிவமைக்கப்பட்டிருப்பது இதன் தனிச்சிறப்பு.

இந்த தரமான பயிற்சி முறையை விளம்பரப்படுத்தும் வகையில் இவர்களது இணையதளமான http://www.tamildigest.com/ -ல் ஒரு கவிதை போட்டி நடத்துகிறார்கள். இந்த போட்டியில் தமிழ் ஆர்வலர்கள் யார் வேண்டுமானாலும் கலந்து கொள்ளலாம்.

போட்டியை பற்றி மேலும் விவரங்களுக்கு இங்கே க்ளிக்கவும் http://tinyurl.com/5uzmffx

http://www.tamildigest.com/ இணையதள வெளியீட்டின்போது...

(Photo Courtesy : http://www.behindwoods.com/)

நேர்மையான முறையில் நடத்தப்படும் இந்த போட்டியில் வெற்றி பெறுபவர்களுக்கு ஊக்கப்பரிசுகள் உண்டு.

வலைப்பதிவுலகில் தமிழ் கவிதைகள் எழுதும் புதுக்கவிகள் ஏராளம் என்று என் தரப்பில் என் நண்பர்களிடம் வாதாடிக் கொண்டிருந்தேன். எனவே இந்த கவிதை போட்டியை பற்றி இதோ இங்கே பகிர்ந்துள்ளேன்.

நம் வலையுலக நண்பர்கள்(ளும்) போட்டியில் கலந்து கொண்டு வெற்றி பெற வாழ்த்துக்கள். போட்டியை பற்றி முடிந்தால் நீங்களும் உங்கள் நண்பர்களிடம் தெரிவியுங்கள்.

First News about "AMBULI 3D" on Net..!

2011-07-14T09:40:00.000+05:30

INDIAGLITZ : 'Ambuli 3D' - With a difference

For all those of you who sulk at this, the makers of 'Ambuli 3D' vouch that you will be awed and proud of this 3D film that's take you onto a rural journey into Indian villages, in 3D!

Sounds interesting right?

'Ambuli 3D' is the brainchild of the makers who had come out with 'Orr Eravuu' last year, the latter was a horror thriller with a scientific approach to supernatural beings. The film also won the 'Best Independent Film' at the Chennai International Film Festival.

'Ambuli 3D' is inspired from a folklore tale which is being told in various parts of village in south India. The film is canned in various parts of villages in Tamil Nadu.

The USP of the film is that it is shot using a state of the art 'Panasonic 3D camera' claim the makers. Normally, a 3D film is shot with two cameras fit in a single huge rig and have lot of constrain in using the rig because of its huge, heavy and consumes a lot of time for setting it up.

With this, constrains have been overcome. It�s digital, compact and has two lenses fixed in a single body which acts like a human eye (just like the camera used in Avatar) which gives a brilliant 3D effect and setting the convergence is also made simple. At the same time while shooting itself you will be able to see the output live in 3D.

This feature film that is coming up in 3D will see a website launch on July 15.

Source : http://www.indiaglitz.com/channels/tamil/article/68614.html

"அம்புலி 3D" படப்பிடிப்பு அனுபவங்கள் - 8

2011-07-11T21:07:00.000+05:30

மூணாறில் "அம்புலி 3D"

யாரோ சென்ற வருடம் (2010) எனது பிறந்தநாளுக்கு வாழ்த்தும்போது, 'அடுத்த பிறந்த நாளுக்கு நீ நல்ல உயரமான இடத்தில் இருக்க வேண்டும்' என்று வாழ்த்தியிருப்பார்கள் போல... அதனாலோ என்னவோ, இந்த முறை எனது பிறந்த நாள் 6600 அடி உயர மலைப்பிரதேசமான 'மூணாறில்' கொண்டாடப்பட்டது. அதுவும், எனது "அம்புலி 3D" படப்பிடிப்பு குழுவினருடன் சேர்ந்து பிறந்த நாள் கொண்டாடிய அனுபவம் என்றென்றும் மறக்கமுடியாது. என்ன ஒரே வித்தியாசம் 'ஹேப்பி பர்த்டே டு யூ' பாடலுக்கு பதிலாக, நாங்கள் படப்பிடிப்பு நடத்திக்கொண்டிருந்த டூயட் பாடல்தான் பின்னனியில் ஒலித்து கொண்டிருந்தது.

↑ தயாரிப்பு நிர்வாகி திரு. சக்திவேல் கத்தியை கொடுக்க...

↑ ஹரியுடன்...

↑ கேமிராமேன் சதீஷூடன்...

↑ டான்ஸ் மாஸ்டர் தினாவுடன்...

கேக் வெட்டும்போது முகத்தில் கரி பூசுவது போல் கேக்-ஐ பூசும் பழக்கத்தை யார் கண்டுபிடித்தது என்று தெரியவில்லை... கேக் வெட்டி, கொண்டாடி முடித்து பார்க்கும்போது, எல்லோர் முகத்திலும் ஹுரோயின் முகத்தில் போடும் மேக்கப்-ஐ காட்டிலும் அதிகமான க்ரீம் பூசப்பட்டிருந்தது.

↑ சாமிக்கு வெண்ணை சாற்றியது போல் தெரிபவர்

துணை இயக்குனர் தினேஷா

↑ வெட்கத்துடன் கேக்-ஐ பெற்று கொள்பவர் சாம் (இசையமைப்பாளர்)

↑ கேக்கினால் நலுங்கு வைத்து கொள்பவர்

துணை இயக்குனர்

↑ அன்புத்தொல்லையால் அவதிப்படுபவர்

உதவி இயக்குனர் தளபதி (பெயரே தளபதிதான்)

↑ லைட்மேன் சீஃப் மோகன் அவர்களுடன்...

↑ கொண்டாட்டத்திற்கு பிறகு

எங்கள் திறந்தவெளி டெம்பரவரி ரெஸ்டாரண்ட்-ல்

மூணாறு... கடல்மட்டத்திலிருந்து 2000 மீட்டர் கடவுளுக்கு அருகில் நம்மை கொண்டு செல்லும் பூலோக சுவர்க்கம். மலைப்பாதையில் பயணம் செய்யும் போது 'செந்தாழம்பூவில் வந்தாடும் தென்றல்...' பாடல் ஞாபகம் வரும், சில சிகரங்களைப் பார்க்கும்போது இயற்கையை பற்றி க(வி)தை எழுத தோணும். இங்கு வாழும் மலைவாழ் மக்களை பார்க்கும்போது 'கொடுத்து வைத்தவர்கள் ' என்று போற்ற தோன்றும். 'வருடத்தில் ஒரு மாதமாவது வந்து தங்கிவிட்டு போக வேண்டும்' என்று உறுதிமொழி எடுக்க தோன்றும். கடமைக்கென்றில்லாமல், கண்ட நேரத்தில் பெய்யும் மழையின் சாரல்கள் நம்மை அடிக்கடி மயிர்கூச்செரிய செய்யும்.

"அம்புலி 3D"-ன் நான்கு இசையமைப்பாளர்களில் ஒருவரான 'சாம்' அவர்களின் பிறந்த ஊர் மூணாறுதான் என்பதால், அவர்மூலமாக நல்ல லொகேஷன்களை கேட்டு தெரிந்து கொண்டோம். 'மைனா' புகழ் திரு. மூணாறு சுப்பிரமணி அவர்கள்தான் லொகேஷன் மேனேஜர்... அவரிடம் இடங்களை கூறி லொகேஷன்களை தேடிப்பிடிப்பதில் சிரமம் எதுவும் இருக்கவில்லை...

மூணாறில் இன்னொரு விஷயம் மிகவும் பிரசித்தம். அது இங்கிருக்கும் 'அட்டை பூச்சிகள்'... காட்டுமிருகங்களான புலி, சிங்கம்,கரடி போன்றவைகள் நம்மை மிரட்டாத அளவுக்கு ஒரு மிரட்டலை இங்கிருக்கும் அட்டை பூச்சிகள் நமக்கு கொடுக்கின்றன. எங்கள் படப்பிடிப்பு குழுவில் இருந்த அத்தனை பேரும், புல்தரையில் பணிபுரியும்போது, பரதநாட்டியம் கற்றுக்கொண்ட பெருமை இந்த அட்டைபூச்சிகளையே சாரும். (ஒரு சின்ன சீக்ரெட் : மேலிருக்கும் பர்த்டே ஃபோட்டோவில் நன்றாக உற்று பாருங்கள்.., அனைவரும் பேண்ட்-ஐ முட்டிவரை தூக்கிவிட்டிருப்பதை காணலாம்... எல்லாம் அட்டை பயம்தான்.)

அன்று மூணாறு ஷெட்யூலில் கடைசி நாள்... ஒரு கோல்ஃப் கிரவுண்டில் டூயட் பாடல் எடுத்துக் கொண்டிருந்தோம்... நடன இயக்குனர் திரு. தினா மாஸ்டர் நேர்த்தியாக பாடலை முடித்து கொண்டிருந்தார். ஆனால், வழக்கமாய் மாலை மட்டுமே பெய்யும் மழை அன்று கொஞ்சம் முன்னாலேயே வந்துவிட்டது. மழை நிற்கட்டுமே என்று அனைவரும் ஒரு பெரிய டார்பாலின் விரிப்பிற்குள் கமுக்கமாய் நின்று கொண்டோம். மழை நிற்காமல் வந்து கொண்டேயிருந்தது. நேரம் அதிகமாகவே, ஷூட்டிங் தாமதமாய்க்கொண்டிருப்பதால்... எங்களுக்குள் கலக்கம் கொஞ்சமாய் எட்டிப்பார்த்துக் கொண்டிருந்தது. எங்கள் கலக்கத்தை குறைப்பதற்காக, கேமிராமேன் சதீஷ்... தனது அஸிஸ்டென்ட் மொபைலில் 'ஊரவிட்டு ஊருவந்து...' என்ற பாடலை போட்டு, அந்த செல்ஃபோனை மைக்-ல் பிடித்தார். அந்த பாடல் ஸ்பீக்கரில் நல்ல சத்தமாக கேட்க ஆரம்பித்தது. ப்ரொடக்ஷன் டீமில் ஜெகதீஷ் என்ற ஒருவர் திடீரென்று பாடலை கேட்டதும் நடனமாட ஆரம்பித்தார். மழையில் அவர் ஆடிய ஆட்டம்... கதகளியும் குத்தாட்டமும் கலந்து ஒரு புது மாதிரியாக இருந்தது. அனைவரும் அவரை ரசித்து ஆராவாரம் செய்து கொண்டிருந்தனர். பாட்டு முடியவும் மழை நிற்கவும் சரியாக இருந்தது. அன்று மாலைக்குள் பாடல் படப்பிடிப்பும் நல்லபடியாக நடந்து முடிந்தது.

மூணாறு படப்பிடிப்புடன் அவுட்டோர் ஷூட்டிங் மொத்தமும் நல்லபடியாக நிறைவுபெற்றது. அன்றே யூனிட் அனைத்தையும் பேக்-அப் செய்து அனுப்பிவிட்டு... அடுத்தநாள், எங்கள் முதல் படமான 'ஓர் இரவு' படப்பிடிப்பு நடத்திய வீட்டை சென்று தரிசித்துவிட்டு வந்தோம்.

'ஓர் இரவு' வீடு...

'ஓர் இரவு' ஷூட்டிங்கின்போது ஏற்பட்ட நண்பர்களில், லொகேஷன் மேனேஜர் திரு.நிக்ஸன் மற்றும், சரவண பவன் ஹோட்டலில் உணவு உபசரிப்பாளர் திரு.அழகர்சாமி ஆகியோரை சந்தித்தோம். மூணாறில், வியூபாய்ண்ட் என்னும் இடத்திலுள்ள டீகடையில் (நாங்கள் வழக்கமாக டீ அருந்தும் இடத்தில்) ஏலக்காய் வாசனையுடன் டீ குடித்துவிட்டு... கிளம்பினோம்... சென்னைக்கு அல்ல... வரும் வழியில் இன்னொரு இடத்திற்கு செல்ல வேண்டியிருந்தது...

அதை அடுத்த பதிவில் பகிர்கிறேன்...

(தொடரும்)

"AMBULI 3D" Website Coming Soon

2011-07-07T01:39:00.000+05:30

"அம்புலி 3D படப்பிடிப்பு அனுபவம் 8"ஆம் பாகம் almost முடித்துவிட்டேன். இன்னும் கொஞ்சம் பிழை திருத்தம் முடிந்ததும் பதிவிடுகிறேன். அதுவரை இந்த "அம்புலி 3D வெப்ஸைட் ப்ரொமோ"வை பகிர்ந்து கொள்ள விரும்பியதால் இதோ...

"அம்புலி 3D" படப்பிடிப்பு அனுபவங்கள் - 7

2011-06-30T18:44:00.002+05:30

"அம்புலி 3D" படப்பிடிப்பு அனுபவம் 1-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 2-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 3-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 4-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 5-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 6-ஐப் படிக்க இங்கே க்ளிக்கவும்

டிஸ்கி : Post Production வேலை முழுமூச்சில் நடந்துவருவதால் தொடர்ந்து துரிதமாக பதிவிட முடியவில்லை..!

தேனியில் அம்புலி

படத்தின் முக்கியமான காட்சிக்காக காட்டுக்குள் இருக்கும் ஒரு பழைய கோவில் போன்ற அம்மைப்பு தேவைப்பட்டது. நாங்கள் ஏற்கனவே கர்நாடகா மாநிலத்தில் ஒரு காட்டுப்பகுதியை தேர்வு செய்து வைத்திருந்தோம். அதுவும், அந்த இடம் இதுவரை எந்தவொரு ஷூட்டிங்கும் எடுக்கப்படாத கன்னிநிலம். எப்படியாவது அனுமதி வாங்கிவிடலாம் என்று பெரும்பாடுபட்டும் கடைசிவரை அங்கு ஷூட்டிங் பர்மிஷன் கிடைக்கவில்லை..! வேறு இடம்தான் பார்க்க வேண்டும் என்றானது.

தொடர்ச்சியாக நடத்த எண்ணிய ஷூட்டிங் தடைபடக்கூடாது என்பதால், இரவெல்லாம் ஷூட்டிங் முடித்துவிட்டு, பகலில் நானும் ஹரியும், மானேஜர்களுடன்... காட்டுக்கோவில்களை தேடும் படலம் நடத்தினோம்.

பகலில் ஓய்வெடுக்காமல் இரவில் ஷூட்டிங் நடத்துவது கஷ்டமாக இருந்ததால், எங்களது ப்ரொடக்ஷன் எக்ஸிக்யூட்டிவ் திரு. சந்தனபாண்டியன் அவர்கள், காரை எடுத்துக் கொண்டு ஊர் ஊராக... இல்லையில்லை... காடு காடாக சுற்றித்திரிந்து கொண்டிருந்தார். பார்க்கும் பழைய கோவில்களையெல்லாம் வீடியோ பிடித்து வந்து எங்களிடம் காட்டிக் கொண்டிருந்தார்... ஆனால் இடம் சரியாக மாட்டவேயில்லை..!

ஒருவழியாக, ஆண்டிப்பட்டிக்கு அருகே தெப்பம்பட்டியில், பளியர்கள் வழிப்படும் வேலப்பன் கோவிலுக்கு அருகாமையில் மலையடிவாரத்தில் ஒரு பழைய கோவில் கிடைத்தது. உடனடியாக அந்த கோவிலை, கலை இயக்குநர் திரு. ரெமியன் அவர்களிடம் ஒப்படைத்தோம். அவரும் story board drawingல் வரையப்பட்டிருந்த பழைய கோவிலுக்கு நிகராக, இப்படத்திற்கு தேவையான செட் வேலைகளை துரிதமாகவும் துல்லியமாகவும் முடித்து கொடுத்தார்.

மேட்டூரிலிருந்து தேனிக்கு வந்து சேர்ந்ததும், முதல் வேலையாக அக்கோவிலை சென்று பார்த்தோம். 'கண்டமனூர் ஜமீன்' அவர்களால் கட்டப்பட்ட அந்த கோவில் இன்றும் தன்மை மாறாமல் கலைச்சிற்ப வேலைப்பாடுகளுடன் காட்டுக்கு நடுவே கம்பீரமாக நின்றிருந்தது. அடுத்த சில நாட்கள்(ஆவது) இக்கோவிலில் படப்பிடிப்பு நடத்த போவதை எண்ணி நானும் மகிழ்ச்சியடைந்தேன். கிடைக்கும் ஓய்வு நேரத்திலெல்லாம், அக்கோவிலின் சுற்றுப்புறங்களை சுற்றிப்பார்த்து கொண்டும், அருகிலிருக்கும் கிராமவாசிகளிடம் கோவிலைப் பற்றிய தகவல்களை சேகரித்து கொண்டும் இருந்தேன்.

'செட்' வேலை சம்மந்தமாக, அந்த கோவில் சிற்பங்களை மோல்டிங் எடுக்க வந்திருந்த நிபுணர்களும், அக்கோவிலின் சிற்பக்கலையை பார்த்து வியந்தார்கள்.

கோவிலின் மூலக்கிரகத்துக்குள் ஏகப்பட்ட குழிகள் தென்பட்டன, விசாரித்ததில், அந்த கோவிலில் புதையல் இருப்பதாக எண்ணி, ஒரு காலத்தில் எங்கெங்கிருந்தோ மக்கள் வந்து கோவிலை சூறையாடியுள்ளனர் என்று தெரியவந்தது. மேலும் அக்கோவிலிலிருந்து ஆண்டிப்பட்டியிலிருக்கும் இன்னொரு கோவிலுக்கு சுரங்கம் இருப்பதாகவும், அது காலப்போக்கில் மூடிக்கொண்டதாகவும் குமுதம் நிருபர் ஒருவர் தெரிவித்தார்.

கோவிலைச்சுற்றிலும் புதர்க்காடு மறைத்திருக்க, அந்த பகுதியில் இரண்டு பெரிய ராஜநாகம் இருப்பதகாவும், பணிபுரியும்போது ஜாக்கிரதையாக வேலைசெய்யும்படியும் மக்கள் பயமுறுத்தினார்கள். முதலில் இதை கண்டுகொள்ளாமலிருந்த எங்கள் குழு, ஒரு நாள் (இரவு) கோவில் மண்டபத்தின் மேலே 40 அடி கிரேனை ஏற்றும்போது, பெரிய பாம்புத்தோல் ஒன்று கிடைத்தது.

"தேளையே பார்த்தாச்சு, After All ஒரு பாம்புத்தோல்தானா நம்மை பயமுறுத்தும்" என்று வீர வசனம் பேசியபடி (உள்ளுக்குள் உதறலெடுத்தாலும்) பணியை தொடர்ந்து நல்லபடியாய் நடத்தி முடித்தோம். நாங்கள் பாம்புக்கு பயப்படவில்லை என்பதற்கு கீழ்கண்ட ஃபோட்டோவே சாட்சி.

படத்திற்குள் : படமெடுக்கும் பாம்பும், நானும், ஹரியும் மற்றும் நடுவில்

மதுரை மணிகண்டன் (Snakeman)

ஃபோட்டோ எடுக்கும்போது, அந்த பாம்பு என் காதில் எழுப்பிய ஸ்ஸ்ஸ் என்ற சத்தம் இருக்கிறதே..! யப்பா..! நல்லவேளை ஃபோட்டோவில் ஆடியோ கேட்காது...

அடுத்த பதிவில், மூணாறு படப்பிடிப்பு அனுபவத்தை பற்றி பகிர்கிறேன்.

(தொடரும்...)

"அம்புலி 3D" படப்பிடிப்பு அனுபவங்கள் - 6

2011-05-30T18:48:00.002+05:30

"அம்புலி 3D" படப்பிடிப்பு அனுபவம் 1-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 2-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 3-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 4-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 5-ஐப் படிக்க இங்கே க்ளிக்கவும்

அவினாசியில் அம்புலி

சென்ற வாரம் பிறந்த ஊரில் (சென்னையில்) ஷூட்டிங் நடந்ததால், ஆர்வத்தில் அதை பற்றி முதலில் எழுதிவிட்டேன். மீண்டும் ரீவைண்டு செய்து, அவுட்டோம் ஷூட்டிங்கில் நடந்த அனுபவங்களின் pending இதோ...

அவுட்டோர் ஷூட்டிங்கில் கோவை, பழனி, மேட்டூரைத் தொடர்ந்து அவினாசியில் கருமத்தம்பட்டியில் ஒரு புல்வெளியில் ஸ்டண்ட் காட்சிகள் நடந்தது. அங்கு புதுமுகங்களோடு திரு. பார்த்திபன் அவர்களும் இடம்பெறும் காட்சிகள் எடுத்து கொண்டிருந்தோம். வேடிக்கை பார்க்கும் மக்கள் கூட்டம் , வேறெங்குமில்லாத அளவுக்கு இங்கு மிகவும் அதிகமாக கூடிவிட்டது. சுமார் 2000 ஆட்கள் கூடிவிட்டபடியால் காவலர்களை அழைத்து அவர்கள் உதவியுடன் நல்லபடியாக ஷூட்டிங் நடத்தி கொண்டிருந்தோம். கூடுதலாக பார்த்திபன சாரின் ரசிகர் மன்ற ஆட்களும் வந்திருந்து படப்பிடிப்பை நல்லபடியாக நடத்த உதவினார்கள்.

நான்கு திசையிலும் 80 அடி உயரத்தில் லைட் வைப்பதற்கு பயன்படும் கோடாக்கள் சுற்றிலும் வைக்கப்பட்டிருக்க, கேமிராமேன் ரொம்ப நாளாகவே என்னிடம் அந்த கோடாவில் ஒருமுறை ஏறி பார்க்கும்படி கூறியிருந்தார். நானும் பிறகு, பிறகு என்று தள்ளிப்போட்டுக்கொண்டே வந்தேன். ஒரு நாள் ஷூட்டிங்கிற்கு சீக்கிரமாகவே போய்விடவே, அவர் கோடாவில் ஏறுமாறு அடம்பிடிக்க ஆரம்பித்துவிட்டார். சரி ஏறித்தான் பார்ப்போமே என்று ஏற ஆரம்பித்தேன். அந்த இடம் புல்வெளி, ஏற்கனவே பரந்து விரிந்து கிடக்கும் மைதானம் என்பதால் காற்று பலமாக அடித்து கொண்டேயிருக்க... பாதி தூரம் ஏறிவிட்டேன். ஆனால் அதற்குமேல் கால்கள் நடுக்கம் காட்ட ஆரம்பித்தன. அப்படியே பாதியில் அமர்ந்துவிட்டேன். மேற்கொண்டு என்ன செய்யலாம் என்று எண்ணியிருக்க, கீழே பார்த்திபன் சாரின் கார் வந்து நின்றது. இதுதான் சாக்கு என்று கூறி, சரசரவென்று இறங்கி வந்துவிட்டேன். கேட்டதற்கு, பார்த்திபன் சார் வந்துவிட்டார் என்று சொல்லி சமாளித்து வைத்தேன். மீண்டும் அந்த கோடாவை அண்ணாந்து பார்க்க, இதில் தினமும் இரவு முழுவதும் நின்று வேலைபார்க்கும் லைட்மேன்களை எண்ணி மிகவும் வியந்தேன். இதை உணரவைத்த கேமிராமேன் சதீஷூக்கு நன்றி..!

கோடாவில் ஏறும் முயற்சியை கைவிட்டு பாதியில் அமர்ந்தபடி

பார்த்திபன் சார் அடித்த ஜோக்கிற்கு சிரித்து, கோடாவிலிருந்து இறங்கிய களைப்பகன்றபடி...

வழக்கமாக வரும் கூட்டத்தைவிட கடைசி நாளான 4ஆவது நாள், கூட்டம் மிகவும் அதிகமாக வந்தவண்ணம் இருந்தன. கூட்டத்தை சமாளிக்கவே பெரும்பாடு படவேண்டியிருந்தது. இதில் காட்சியை எப்படி படம்பிடிப்பது? என்று எண்ணி வருந்தி கொண்டிருக்க, படப்பிடிப்பு குழுவிலிருந்த பலரும் உதவ முன்வந்தார்கள். குறிப்பாக லைட்மேன் சீஃப் திரு.மோகன் அவர்கள், கையில் மைக் பிடித்தபடி கூட்டத்தினரிடம் நகைச்சுவையாக பேசி அவர்களை குதூகலப்படுத்தி நட்பு கொண்டு அவர்களை சமாளித்து கொண்டிருந்தார். குழந்தைகளை "A for AMBULI" (இதிலும் ஒரு பப்ளிசிட்டி பாருங்கள்..!) என்று மேக்கிங்க ஷூட் செய்யும் கேமிராவை பார்த்து கூறும்படி விளையாட்டு காண்பித்து கொண்டிருந்தார்.

கூட்டத்திற்கு மத்தியில் நான், ஹரி மற்றும் எங்கள் டைரக்ஷன் டிபார்ட்மெண்ட். பின்னால் நடுவில் நின்றிருப்பவர் லைட் சீஃப் திரு. மோகன்

ப்ரொட்யூஸர் திரு. KTVR லோகநாதன் சாரும் (வலமிருந்து 2ஆவது நபர்) அவரது நண்பர்களும். வலதுபக்கமிருப்பவர் அவரது மகன் டாக்டர். அருண்

குறிப்பாக வேடிக்கை பார்க்க வந்த கூட்டத்தில் ஒருவர், குடித்துவிட்டு வந்து, படத்தில் நடித்தே தீருவேன் என்று அடம்பிடித்து கொண்டிருந்தார். தண்ணியடித்தால் சிலர் குழந்தைகளாகிவிடுகின்றனர். சாக்லெட் வாங்கித்தருவதாக ஏமாற்றுவது போல் சான்ஸ் வாங்கி தருவதாக ஏமாற்ற வேண்டியதாய் உள்ளது. அவர், யார் சொல்லியும் கேட்காமல் குறுக்கே சுற்றிக்கொண்டிருக்கவே, உதவி இயக்குனர்கள் அவரை தனியாக தள்ளி கொண்டு போய், மேக்கிங் கேமிராவை கொண்டு அவரை பாடச்சொல்லி பேச சொல்லி படம்பிடித்து கொண்டிருந்தனர். அவரும் திருப்தியாக வீடு திரும்பினார். அனேகமாக அடுத்த ப்ராஜெக்டுக்கான முதல் ஆடிஷன் ஃபூட்டேஜ் இதுவாகத்தான் இருக்கும் என்று நினைக்கிறேன்.

லைட் யூனிட்டில் திரு.பாண்டு என்று ஒரு மும்பைக்காரர் வந்திருந்தார். ஓய்வு நேரங்களில் இவரிடம் தமிழ் வார்த்தைகள் சொல்லி அதை திரும்ப சொல்லக்கேட்டு அவர் கூறும் மழலை தமிழை ரசித்து விளையாடிக் கொண்டிருப்போம். அவரும் இதை ரசித்து விளையாடுவார். பாம்பேவில் ஷூட்டிங்கின்போது கண்டிப்பாக அவரது வீட்டிற்கு வரவேண்டும் என்று அன்பு பொழிவார். அவினாசியில் கடைசி நாள் ஷூட்டிங்கின்போது, இவருக்கு கோடாவில் தேள் கடித்துவிட்டது. உடனடியாக அவரை மருத்துவமனைக்கு அழைத்து சென்று குணப்படுத்தினார்கள். அடுத்த நாளே அவரும் சகஜமானார். ஆனால் இவருக்கு தேள் கடித்த சமாச்சாரம் எங்களுக்கு அடுத்தநாள் காலைதான் தெரியவந்தது. அவினாசியில் கடைசி நாள் ஷூட்டிங் என்பதால் தடங்கல் ஏற்படாமல் இருக்கும்பொருட்டு இந்த விஷயத்தை மேனேஜர்கள் எங்களிடம் கூறாமல் இரகசியமாக கையாண்டுள்ளனர். நல்லவேளையாக அவருக்கு ஆபத்து ஏதுமில்லை என்று தெரிந்த பிறகே நிம்மதியானோம்.

ஆனால் நாங்கள் தேனிக்கு அடுத்த கட்ட படப்பிடிப்புக்கு பயணப்படும்போது இன்னொரு விஷயம் கேள்விப்பட்டு பீதிக்குள்ளானோம். அவினாசியில் நாங்கள் ஷூட்டிங் நடத்திய புல்வெளியில், ஆங்காங்கே புல்களினூடே தேள்கள் ஏராளமாக சுற்றித்திரிந்துக் கொண்டிருந்ததாக குழுவில் பலரும் தெரிவித்தனர். நாங்கள் படம்பிடித்தது ஸ்டண்ட் காட்சி என்பதால் புல்வெளியில் சில இடங்களில், தரையில் உட்கார்ந்து, படுத்து, உருண்டு என்று ஷூட்டிங் செய்திருந்தோம். நல்லவேளையாக யாருக்கும் எதுவும் ஆகவில்லை..!

அடுத்த பதிவில் தேனியில் நடந்த பகிர்வுகளை பதிகிறேன்...

(தொடரும்..!)

"அம்புலி 3D" படப்பிடிப்பு அனுபவம் 7-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவங்கள் - 5

2011-05-24T10:54:00.003+05:30

"அம்புலி 3D" படப்பிடிப்பு அனுபவம் 1-ஐப் படிக்க இங்கே க்ளிக்கவும்
"அம்புலி 3D" படப்பிடிப்பு அனுபவம் 2-ஐப் படிக்க இங்கே க்ளிக்கவும்
"அம்புலி 3D" படப்பிடிப்பு அனுபவம் 3-ஐப் படிக்க இங்கே க்ளிக்கவும்
"அம்புலி 3D" படப்பிடிப்பு அனுபவம் 4-ஐப் படிக்க இங்கே க்ளிக்கவும்

சொந்த ஊரில் ஷூட்டிங்

இந்த வாரம் "அம்புலி 3D" திரைப்படத்தின் படப்பிடிப்பு சென்னையில் Kings Instituteல் சிறப்பாக நடந்தேறியது. என்னதான் வெளியூர் ஷூட் என்றாலும், எனக்கு நான் பிறந்த ஊரில் ஷூட் செய்வது ரொம்பவும் பிடித்திருந்தது.

லோக்கலில் ஷூட்டிங் என்றதும் நண்பர்களும் உறவினர்களும் ஷூட்டிங்கை வேடிக்கை பார்க்க அழைக்குமாறு கேட்டுக் கொண்டிருந்தார்கள். ஆனால் வேலை பளுவின் காரணத்தினால் எல்லோரையும் அழைக்க முடியவில்லை..! இன்னொரு முக்கிய காரணம், கதையின் சுவாரஸ்யம் படம் பார்க்கும்போது முழுவதுமாய் அவர்களுக்கு கிட்ட வேண்டும் என்ற ஆசையும், ஷூட்டிங்கை வேடிக்கை பார்ப்பது, சினிமா அல்லாத ஆட்களுக்கு மிகவும் போர் அடிக்கும் என்ற எண்ணமும்தான். இருந்தாலும் நான் நிறைய 'சாரி' கேட்க வேண்டியிருக்கும்... மன்னித்துவிடுவார்கள் என்று நம்புகிறேன்.

ஆனாலும், சில நண்பர்கள் ஸ்பாட்டுக்கு வந்து சிறப்பித்தார்கள். குறிப்பாக 'கேபிள் ஷங்கர்' வந்திருந்து வாழ்த்து தெரிவித்தார். பிறகு, சத்யம் தியேட்டரின் ஜி.எம். திரு. நிரஞ்சன் வந்திருந்து வாழ்த்து தெரிவித்தார். அவர்களுக்கு நன்றி..!

கொஞ்சம் ஒதுக்குப்புறமான இடம் என்பதால் கூட்டமும் அவ்வளவாய் இல்லை..! அதனால் ஷூட்டிங்கை சுமூகமாக நடத்த முடிந்தது.

இந்த வார ஷூட்டிங்கின் இன்னொரு ஸ்பெஷல், 'மீடியா கவரேஜ்'. தொலைக்காட்சி மற்றும் இணையதள நிருபர்கள் வந்திருந்து பேட்டி கண்டு சென்றனர்.

அதன் ஒரு பகுதி, Behindwood.comல் நேற்று இந்த வீடியோ காணக்கிடைத்தது.

மேலும் வலையில் கிடைத்த சில ஃபோட்டோ மீன்கள்

க்ளாப் பலகை

இடமிருந்து : ஹரிஷங்கர், ஹரீஷ் நாராயண் (நான்), வெங்கடம் பிரபு ஷங்கர்

இடமிருந்து : நானும், திரு. நிரஞ்சன் (G.M. - சத்யம் சினிமாஸ்)

கேமிராமேன் : சதீஷ். G

இசையமைப்பாளர்கள் : வெங்கட் பிரபு ஷங்கர், சதீஷ் குமார் (நால்வரில் இருவர்)

Mr. பாஸ்கி

All Photo & Video Courtesies : www.Behindwoods.com, www.Indiaglitz.com

படம் 99% முடிந்துள்ளது. இன்னும் 1%, வரவிருக்கும் வாரங்களில் முடிந்துவிடும். அதையும் பகிர்கிறேன்..!

"அம்புலி 3D" படப்பிடிப்பு அனுபவம் 6-ஐப் படிக்க இங்கே க்ளிக்கவும்

கேணிவனம் - விமர்சனம்

2011-05-11T09:03:00.000+05:30

கேணிவனம் குறித்து எனது நண்பரும், 'அம்புலி' திரைப்படத்தின் இசையமைப்பாளருமான திரு. வெங்கட் பிரபு ஷங்கர் எழுதிய விமர்சனத்தை இப்பதிவுடன் பகிர்ந்துள்ளேன்...

விமர்சனத்தை படிக்க கீழுள்ள இணைப்பை க்ளிக்கவும்
"கேணிவனம்" - காலத்தை வெல்லும் பிரயாணம்

எனக்கு இமெயிலில் வந்த விமர்சனங்களையும் விரைவில் சுருக்கமாக தொகுத்து பதிகிறேன்.

நன்றி..!

"அம்புலி 3D" படப்பிடிப்பு அனுபவங்கள் - 4

2011-04-30T16:17:00.011+05:30

"அம்புலி 3D" படப்பிடிப்பு அனுபவம் 1-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 2-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 3-ஐப் படிக்க இங்கே க்ளிக்கவும்

படத்தினும் சுவாரஸ்யமான ஒரு சம்பவம்

Truth is stranger than fiction என்று கூறுவார்கள்... அதே போலத்தான், சமீபத்தில் எங்கள் படப்பிடிப்பில் நடந்த ஒரு சம்பவம், திரைப்படத்தில் காட்டும் திகிலையும் தாண்டி நிஜத்தில் மிரள வைத்தது. 25ஆம் தேதியன்று, படத்தின் க்ளைமேக்ஸில் இடம்பெறும் கூட்டுப்பிரார்தனை பாடல் ஒன்றை படம் பிடிப்பதற்காக மேட்டூர் நீர் தேக்கத்தின் பிரம்மாண்ட சுற்றுவட்டாரத்தில் இருக்கும் ஒரு குட்டி தீவை தேர்ந்தெடுத்திருந்தோம். அந்த தீவிற்கு 'பண்ணைவாடி' என்ற கிராமத்திலிருந்து பரிசல் வழியே போய் சேர வேண்டும். சேர்ந்தோம்.

கரையிலிருந்து தெரியும் தீவு

இரவுப்பாடல் என்பதால், சுமார் 300 பேர் கொண்ட குழு இத்தீவில் கூடியிருந்தது. பாடலை ஒலிபரப்பியதும், சற்றைக்கெல்லாம், படைதிரளாக பூச்சிகள் வந்து ரீங்காரமிட்டபடி பறந்து கொண்டு பயங்கர தொந்தரவு கொடுத்தது. மிகுந்த போராட்டத்திற்கு பிறகு, புகை போட்டு பூச்சிகளை வென்று மீண்டும் படம்பிடிக்க ஆயத்தமானோம். மீண்டும் பாடலை ஒலிபரப்பியதும், சற்று நேரத்துக்கெல்லாம் பலத்த காற்று வீச ஆரம்பித்தது. காற்றில் பாடலுக்காக போடப்பட்டிருந்த செட் ஆட்டம் காண ஆரம்பித்தது. செட் வீழ்ந்தால், பொருட்சேதமும், நேர விரயமும் அதிகம் என்பதால், ஆளுக்கொரு கொம்பு பிடித்துக் கொண்டு, செட்-க்கு சப்போர்ட் கொடுத்து, மிகுந்த பிரயத்தனத்துடன் செட்-ஐ பாதுகாத்து காற்றிலிருந்து தப்புவித்தோம். காற்றும் கொஞ்சம் தணிந்தது. மீண்டும் பாடல் ஒலிபரப்பியதும், இம்முறை கடுமையான மழை..!

நட்சத்திரங்களல்ல..! பூச்சிகளின் படைத்திரள்..!

இதுவரை பூச்சியையும், காற்றையும் வென்றாலும், அத்தீவு மழைக்கு ஒதுங்க இடமில்லாத தீவு என்பதால், நடிக்க வந்திருந்த ஆட்கள் கரைதிரும்ப வேண்டுமென்று அடம்பிடிக்க ஆரம்பித்தார்கள். பரிசல் காரர்களோ, காற்றுடன் மழை வருவதால் பரிசல் எடுக்க முடியாது என்று கைவிரித்தனர். சில தைரியர்கள் தண்ணீரில் இறங்கி கரைக்கு நடக்க ஆரம்பித்தார்கள் (அத்தீவிலிருந்து ஒரு குறிப்பிட்ட தடத்தில் நடந்தால், நடந்தே கரை சேரலாம்..! தடம் தெரிந்தவர்கள் மட்டும்..!) தீவிற்கு மின்சாரம் கொண்டுவரும் பொருட்டு, கரையிலிருந்து ஜெனரேட்டரை இயக்கி அதிலிருந்து நீளும் வயர்களை கம்புகள் போட்டு தண்ணீரில் நட்டு வைத்திருந்தோம். இதனால், தண்ணீரில் இறங்கி நடப்பவர்களுக்கு ஷாக் அடிக்கும் ஆபத்து உண்டு என்று பயந்து, வாக்கி டாக்கியில் ஜெனரேட்டரை அணைத்துவிடும்படி கூறியாயிற்று. ஆனால், ஜெனரேட்டரை அணைத்ததும், தீவிலும், கரையிலும் கும்மிருட்டு..! இருட்டில் கடும் மழையில் நனைந்தபடி அத்தனை பேரும் என்ன செய்வதென்று தெரியாமல் நிற்க, வேறுவழியின்றி அன்றைய படப்பிடிப்பை ரத்து செய்துவிட்டு, முக்கியமான கருவிகளை மட்டும் செட் போடப்பட்டிருந்த அரங்கத்தின் அடியில் பத்திரப்படுத்திவிட்டு தண்ணீரில் இறங்கி கரைக்கு நடக்கலானோம்.

மோனு, மீனு என்று நடிக்க வந்திருந்த இரண்டு குழந்தைகளில், ஒரு குழந்தையை நானும், இன்னொரு குழந்தையை அடியாளாக நடிக்க வந்த திரு.'கேபிள்' மணி என்பவரும் உப்பு மூட்டை தூக்கி கொண்டு நடந்து கொண்டிருந்தோம். என் முதுகில் இருந்த குழந்தை, தைரியமாக நிறைய ஜோக்குகள் சொல்லிக் கொண்டே வந்தது. நானும் பயத்துடன் சிரித்தபடி நடித்துக் கொண்டே நடந்தேன்.

தண்ணிரில் அனைவரும் இறங்கி போய்க்கொண்டிருக்கும்போது, கும்மிருட்டில் திடீரென்று மின்னல் வெளிச்சமடிக்க, சுற்றிலும் நீரும், நடுவே கும்பலாய் மனிதர்கள் நடந்து போவதும் ஏதேதோ திரைப்படங்களில் பார்த்த காட்சிகளை ஞாபகப்படுத்தி கொண்டிருந்தது.

தண்ணீரில் நடப்பது ஒன்றும் அவ்வளவு கிலியாக இல்லை..! நீர்மட்டம் இடுப்புவரை மட்டுமே இருந்தது. ஆனால், அடிக்கும் காற்றுக்கு, இரு பக்கத்திலிருந்தும் தண்ணீர் மேலே பீய்ச்சி அடித்தது மட்டும் சற்று மிரட்டலாக இருந்தது. 'அலை பெரிதானால் என்னவாகும்' என்ற அனாவசிய கற்பனைகளுக்கு இடம் கொடுக்காமல் மெல்ல நடந்து கொண்டிருந்தோம். அப்போது, உடன் நடக்கும் கிராமவாசிகளில் ஒருவர் 'மழை வந்தால் ஏரியில் நீர் மட்டம் விறுவிறுவென்று ஏறிவிடும்' என்று ஒரு குண்டை போட்டார். உடனே அனைவரது நடையிலும் ஒரு வேகம் கூடியதை கவனிக்க முடிந்தது. வாழ்க அந்த நபர்..!

ஒரு வேடிக்கை என்னவென்றால், அடுத்த நாள்..! (26ஆம் தேதி) போதிய ஏற்பாடுகளோடு வந்து மீண்டும் படப்பிடிப்பு நடத்த ஆயத்தமானபோது, அன்றும் கடும் மழை..! கிராம வாசிகள் அனைவரும் எங்களை வாழ்த்த ஆரம்பித்தனர். நாம் படப்பிடிப்பு நடத்த வந்த நேரம், அவர்கள் கிராமத்தில் நல்ல மழை பிடித்துக் கொண்டது என்பது அவர்களுக்கு மகிழ்ச்சி..! பாடலைப் போட்டதும் மழை வருகிறதே..! பாடல் ஒருவேளை ஹம்ரிதவர்ஷினி ராகமோ..? என்று நாங்கள் வெறுப்பில் புலம்பி கொண்டிருந்தோம். அன்றும் படப்பிடிப்பு ரத்து..! அடுத்த நாள் ஞாயிற்றுக்கிழமை..! அன்றும் மழை வர வாய்ப்பிருக்கிறது என்று கூகிளார் கூறவே..! ரிஸ்க் எடுக்க வேண்டாமென்று எண்ணி..! தீவுக்கே போகவில்லை..!

படப்பிடிப்பில்...

எங்கள் நிலையைப் பார்த்து பரிதாபப்பட்ட கிராமத்து மக்கள், அவர்களாகவே ஒரு பரிகார பூஜையை நடத்தி கொடுத்தார்கள். அந்த அன்புக்கு எங்கள் குழு என்றென்றும் நன்றிக்கடன் பட்டிருக்கிறோம்...! 4ஆவது நாள்..! 28ஆம் தேதி அன்று இரவு நல்ல வேளையாக (?) மழை வராததால் பாடல் படப்பிடிப்பு அன்றிலிருந்து நல்லபடியாக நடந்தது.

(அனுபவம் தொடரும்..!)

"அம்புலி 3D" படப்பிடிப்பு அனுபவம் 5-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவங்கள் - 3

2011-03-27T23:57:00.003+05:30

"அம்புலி 3D" படப்பிடிப்பு அனுபவம் 1-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவம் 2-ஐப் படிக்க இங்கே க்ளிக்கவும்

பழனியில் 'அம்புலி 3D' படப்பிடிப்பு

ரயில் பயணத்தில் அனைவரும் கோறும் குட்டி வரம், ஜன்னலோர சீட்டு..! அந்த ஜன்னலோர சீட்டுக்கு அழகு சேர்ப்பது, பயணத்தில் அதன்வழியே தெரியும் மலைமுகடுகள்.

எனது சிறுவயது முதலே மலைகளை பார்த்தால் ரொம்பவும் பிடிக்கும். லீவில் உறவினர்கள் வீட்டுக்கு போவதாய் இருந்தால், அவர்கள் ஊரில் மலை இருக்கிறதா என்று உடனே மனம் எதிர்ப்பார்க்க ஆரம்பிக்கும், அந்த ஆசையாலோ என்னமோ, நாங்கள் படப்பிடிப்பு நடத்திய பழனி ஊர் மிகவும் பிடித்துவிட்டது. காரணம், ஊர் எல்லையில் தெரியும் கொடைக்கானல் மலைத்தொடரும், பழனி மலையும், எங்களுக்கு உடனிருந்து உதவிய நண்பர்களும்..!

பழனியை பற்றி சங்க காலத்தில் எத்தனை பாடல்கள் இருந்தாலும்,, 'பழம் நீயப்பா..! நியானப்பழம் நீயப்பா..!' என்ற அவ்வையின் குரலில் கம்பீரமாக ஒலிக்கும் பாடல் சட்டென நினைவுக்கு வருவதால், இதை பாடல் பெற்ற ஸ்தலம் என்றே கூறலாம்.

பழனியில் எங்கள் குழு தங்கியிருந்த ஹோட்டல் (Temple View)லிருந்து தினமும் பழனி மலையை பார்த்தபடி லொகேஷன் ஸ்பாட்டுக்கு கிளம்பியதை மிகவும் மங்களகரமாக கருதினோம்.

பார்த்திபன் கனவுபார்த்திபன் சாரை வைத்து படத்தை இயக்குவேன் என்று கனவிலும் நினைத்தது கிடையாது. அந்த கனவு பலித்த(துக்கொண்டிருப்ப)தில் மகிழ்ச்சி. இயக்குநர் மற்றும் நடிகர் என்பதால் காட்சியை உள்வாங்கி கொண்டு கலக்குகிறார். 3D படம், வித்தியாசமான கதாபாத்திரம், என்ற அம்சங்களை நன்றாக புரிந்து கொண்டு அட்டகாசப்படுத்துகிறார். அவருடன் வேலை செய்யும் போது களைப்பு தெரியாதபடி கலகலப்பாக பேசிக்கொண்டிருந்தது எங்கள் குழுவினருக்கு உற்சாகமளித்தது.

உதாரணம், அவர் ஒரு கட்டை ஏணியில் ஏறி கீழே இறங்குவது போன்ற காட்சி எடுக்க வேண்டும், எடுக்கப்பட்டது..! எங்கள் உதவி இயக்குநர் தினேஷிடம் 'சார் பத்திரமாக இறங்க கை கொடுக்கும்'படி கூற, 'நல்லா நடிச்சா மட்டும் கை கொடுங்க சார்..! இல்லண்ணா வேணாம்..' என்று கூறிவிட்டு அவரே இறங்கிவிட்டார். இது போல் வார்த்தைக்கு வார்த்தை அவரது பாணியில் பேசி நடித்து கொடுத்தார்.

ஷூட்டிங் பழனிக்கு வெளிப்புறமாய் இரவு நேரங்களில் மட்டுமே நடந்ததால், வேடிக்கை பார்க்கும் கூட்டம் கம்மியாகவே இருந்தது, நாங்களும் இருந்த கூட்டத்தை சுலபமாக கன்ட்ரோல் செய்து கொண்டோம், ஆனால், பார்த்திபன் சார் வந்தபிறகு கூட்டம் அதிகமாகிவிட்டது, காவலர்கள் தேவைப்படுமளவிற்கு கூட்டம் சேர்ந்துவிட்டது. அதுவும் குறிப்பாக, பழனியாண்டவருக்கு மாலையணிந்து பாதயாத்திரை செல்லும் பக்தர்கள்தான் அதிகம்.

பாஸ்... என்கிற பாஸ்கி..!

அரி கிரி அசெம்ப்ளியில் ஆரம்பித்து இன்று இண்டர்நேஷனல் க்ரிக்கெட் மேட்ச்க்கு தமிழ் கமெண்ட்ரி கொடுக்குமளவிற்கு பிஸியானவர். இவர் எங்களது திரைப்படத்தில் ஒரு முக்கிய கதாபாத்திரத்தில் நடிக்கிறார். ஸ்பாட்டில் இவரை நகைச்சுவை வங்கி என்றுதான் சொல்வோம். எங்கே உள்வைத்திருக்கிறாரோ தெரியவில்லை, ஜோக்குகளை Withdrawal செய்துகொண்டேயிருக்கிறார்.

சாப்பிடும்போது அதிகம் பேசக்கூடாது என்று சொல்வார்கள். ஆனால் இவர் சாப்பிடும்போது பேசுவதை கேட்க, ஒரு கூட்டமே கூடும். இவருக்கு டாக்டர் பட்டம் தாராளமாக கொடுக்கலாம், காரணம், வாய்விட்டு சிரித்தால் நோய்விட்டு போகும் என்ற பழமொழி மட்டும் பலிக்கிறதாயிருந்தால், இவரால் பலபேரை குணமாக்க முடியும்.

'நான் கடவுள்' ராஜேந்திரன்

வில்லனாய் சினிமாவில் தெரிபவர்கள் நேரில் மிகவும் மென்மையானவர்கள் என்ற கூற்றை நம்பியார் சார் காலத்திலிருந்தே சொல்வார்கள், கேள்விப்பட்டிருக்கிறேன். அது எந்தளவுக்கு உண்மை என்று இவரை நேரில் சந்தித்து தெரிந்து கொண்டேன். மிகவும் ஒரு எளிமையான ஒரு மனிதர். நல்ல நண்பர்..! கடும் உழைப்பாளி..! இவரது உழைப்பை யாரும் எள்ளளவும் குறை கூற முடியாது. தேவையான காட்சியை, எந்தளவுக்கும் சிரமம் எடுத்தும் நடித்து கொடுக்க கூடியவர். கடந்து வந்த பாதையை மறக்காதவர் அனைவரிடம் அன்பாக பழகுபவர்.

கேமிராமேன் சதீஷ், இவரிடம் சென்று, சமீபத்தில் இவர் நடித்த வெற்றிப்படமான 'பாஸ் என்கிற பாஸ்கரனில்' இவர் கூறும் 'வாப்பா தலதளபதி..' என்ற வசன உச்சரிப்பில், 'வாப்பா ஹரி ஹரீஸ்ஸே..!' (என்னையும் ஹரியையும்) என்று பேச சொல்லி கேட்டு, அதை மொபைலில் ரெக்கார்ட் செய்து இடைவேளைகளில் போட்டு காட்டி வெறுப்பேற்றி கொண்டிருந்தார்.

அம்புலி 3D, த்ரில்லர் படம்தான் என்றாலும், என்னதான் இரவு முழுக்க களைப்புடன் பணிபுரிந்தாலும், காலையில் மீண்டும் அறைக்குவந்து படுக்கும்போது, தூரத்தில் பழனிமலையில் ஸ்பீக்கரில் ஒலிக்கும் திருப்புகழ் பாடல்களை கேட்டபடி தூங்கும் சுகம் மிகவும் பிடித்துப்போய்விட்டது. மீண்டும் ஒருமுறை கண்டிப்பாக இந்த வரம் கிடைக்க வேண்டும் என்று ஆசைப்படுகிறேன். படப்பிடிப்பின் போது எங்களை சொந்த பிள்ளைகளாய் எண்ணி உதவிய 'பழனி ஆறுமுகம்' ஐயா அவர்களுக்கும், படப்பிடிப்பு முடிந்ததும் பழனி மலைக்கு அழைத்து சென்று வழிபாட்டிற்கு வழிகாட்டிய ராம்குமார் என்ற நண்பருக்கும் இந்த இடத்தில் நன்றியை தெரிவித்து கொள்கிறேன்.

தற்போது, அம்புலியில் கிராமத்து காட்சிகளை மேட்டூர் அணை அருகேயுள்ள கொளத்தூர் மற்றும் பண்ணைவாடி கிராமத்தில் படம்பிடித்து வருகிறோம். இங்கு நேர்ந்த அனுபவங்களை அடுத்த பதிவில் பகிர்கிறேன். இப்போதைக்கு நிறைய வேலை இருப்பதால்... குட்பாய்..!

'தம்பீ..! ஷாட் ரெடியா..?'

(தொடரும்)

"அம்புலி 3D" படப்பிடிப்பு அனுபவம் 4-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவங்கள் - 2

2011-03-03T19:35:00.004+05:30

"அம்புலி 3D" படப்பிடிப்பு அனுபவம் 1-ஐப் படிக்க இங்கே க்ளிக்கவும்

அம்புலி : மகளிர் ஸ்பெஷல்

"டாவின்ஸி கோட்" புத்தகத்தில், பெண்கள் இவ்வுலகினில் எப்படி எக்கலாஜிக்கலி பேலன்ஸ் செய்யப்பட்டிருக்கிறார்கள் என்பதை பற்றி சில விளக்கங்கள் வரும். இந்த பேலன்ஸை, மோனலிஸா ஓவியத்தில், டாவின்ஸி எப்படி சூட்சமமாக சொல்லியிருக்கிறார் என்பதை பற்றி மிக சுவாரஸ்யமாக டான் ப்ரௌன் அவர்கள் விளக்கியிருப்பார்... அதே போல், திரு. கல்கி அவர்கள் தனது கதைகளின் கருவை ஒரு பெண்ணின் சபதத்தையோ அல்லது வைராக்கியத்தையோ முன்வைத்து எழுதியிருப்பார்.

அம்புலியிலும், ஒரு பெண்ணின் கருவே, கதையின் கரு... அப்படிப்பட்ட கதையின் கருவாக இடம்பெறும் முக்கிய காட்சிகளை கலைராணி, உமா ரியாஸ்... ஆகியவர்கள் ஒத்துழைப்பில் சமீபத்தில் ஒரு கிராமத்தில் படம்பிடித்து முடித்தோம்...

கலைராணி மேடம்... பெயருக்கு ஏற்றார் போல், கலையில் ராணிதான்.... மிக தத்ரூபமான நடிப்பு... நல்லதொரு இன்வால்மெண்ட். அம்புலியில் தனது கதாபாத்திரத்தை பற்றி அவர் கேட்டு தெரிந்து கொள்ளும்போது, கண்களை மூடிக்கொண்டு உள்வாங்கி பிறகு ஷாட் எடுக்கும்போது, மிக அழகாக அந்த கதாபாத்திரத்தை வெளிப்படுத்தினார். ஓன் டேக் ஆர்டிஸ்ட் என்று சொல்வது மிகவும் பொருந்தும். இவர் நடிக்கும்போது மட்டும் ஷூட்டிங் வேடிக்கை பார்க்கும் கிராமத்து பெண்கள் கூட்டம் அதிகமாக இருந்தது.

படப்பிடிப்பின் போது இவருக்கு கடும் காய்ச்சல் அடித்து கொண்டிருந்தது, ஷூட்டிங் நடத்தமுடியுமோ என்று நாங்கள் ஐயுறும்போது, துளியும் தடங்களின்றி எடுக்க, அவர் கொடுத்த ஒத்துழைப்பை என்றும் மறக்க முடியாது. காட்சிகளுக்கு மத்தியில் ஒரு சின்ன இடைவேளையிலும், கயிற்று கட்டிலிலும், தரையிலும் அவர் படுத்து உறங்கி குட்டி குட்டி ஓய்வுகள் எடுத்து கொண்டு நடித்து கொடுத்தார். அவரது காட்சிகள் முடிந்ததும், தான் அம்புலியில் பங்கேற்று நடித்த பாட்டி கதாபாத்திரத்தின் உடைகளையும், அணிகலன்களையும் அடையாளமாக வைத்து கொள்ளப்போவதாக கூறி கேட்டு வாங்கி சென்றது எங்களுக்கு மிகவும் மகிழ்ச்சியாக இருந்தது.

அடுத்து உமா ரியாஸ் அவர்கள்... இவரை நல்ல நடிகை என்பதைவிட, எங்கள் குழுவுக்கு கிடைத்த நல்லதொரு தோழி என்றுதான் சொல்ல வேண்டும். தோழி மட்டுமின்றி ஒரு வெல்விஷரைப் போல், படப்பிடிப்பில் துளியும் முகம் கோணாமல், எத்தனை முறை காட்சியை மாற்றியமைத்து எடுத்தாலும், மிகவும் இயல்பாக நடித்து கொடுத்தார். இவரிடம் டைரக்டராக கூடிய தகுதி அதிகம் உள்ளது. இவரது ஸ்பெஷாலிட்டியான மிமிக்ரி கலையை (குறிப்பாக திரு. தேங்காய் சீனிவாசனின் உச்சாடனங்கள்) படப்பிடிப்பு இடைவேளையில் செய்து காட்டி ஒட்டு மொத்த குழுவின் கவனத்தையும் ஈர்த்து கைதட்டு வாங்கினார்.

என்னதான் ஷாட் எடுக்கும் முன்பு மிகவும் ஜாலியான முகபாவத்தில் இருந்தாலும், கேமிரா ரோல் ஆனதும், சட்டென்று தனது கதாபாத்திரத்தின் முகபாவத்துக்கு வந்து விடுவது கண்டு வியந்தேன். இவர் நடித்த 'அன்பே சிவம்' எனக்கு பிடித்த படங்களில் ஒன்று, அதில் அவரது நடிப்பை கண்டு வியந்திருந்ததால், நம் படத்தில் இவரை எப்படியாவது நடிக்க வைக்க வேண்டும் என்ற நீண்ட நாள் எண்ணம் ஈடேறியதில் மகிழ்ச்சி..!

அம்புலியில் அடுத்த பெண், போன பதிவிலேயே நான் அறிமுகம் செய்துவைத்த எங்களது திரைப்படத்தின் கதாயாகியான சனம். புதுமுகம்தான் என்றாலும் ஆங்கில ஸ்டேஜ் ப்ளேக்களில் அதிகம் பங்கேற்றவர் என்பதால் நடிப்பிற்கு பஞ்சமில்லை... தமிழ் நன்றாகவே பேசுகிறார். (ஆச்சர்யம்..!)

தன்னுடைய காட்சிகளில் மட்டுமில்லாமல், மற்ற காட்சிகள் எடுக்கும்போதும் ஆர்வமாக படப்பிடிப்பு தளத்தில் இருந்தபடி கவனித்து வருகிறார்... நடிகை என்று அலட்டிக் கொள்ளாமல் குழுவில் அனைவரிடமும் இதமாய் பேசி வருவதால், இவர் நன்றாய் வர வேண்டும் என்று பலரும் நினைக்கும்படி நடந்து கொள்வது மகிழ்ச்சி..!

இப்படத்தில் இன்னும் ஒரு கதாநாயகியான திவ்யா நாகேஷ்... அவரது காட்சிகள் இன்னும் எடுக்கப்படாததால் அவரை பற்றி இப்பதிவில் சொல்ல முடியவில்லை...

மகளிர் தினம் சமீபத்தில் இருப்பதால், அன்று பதிவிட நேரம் இருக்குமோ இல்லையோ என்று இன்றே பதிகிறேன். மேலும் அதிக விவரங்களோடு "அம்புலி 3D" படப்பிடிப்பு அனுபவத்தை அடுத்த பதிவில் பதிகிறேன்.

"அம்புலி 3D" படப்பிடிப்பு அனுபவம் 3-ஐப் படிக்க இங்கே க்ளிக்கவும்

"அம்புலி 3D" படப்பிடிப்பு அனுபவங்கள் - 1

2011-02-13T10:44:00.004+05:30

முதல் நாள் எங்களது தயாரிப்பாளர் திரு. KTVR லோகநாதன் சார் அவர்களின் கல்லூரியில் சில முக்கியஸ்தர்கள் முன்னிலையில் ஒரு சின்ன விழாவோடு படப்பிடிப்பு துவங்கியது. வந்திருந்த அனைவரும் வாழ்த்தி படப்பிடிப்பை துவங்கி வைத்தனர்.

ஷூட்டிங் என்றாலே வேடிக்கை பார்ப்பவர் கூட்டம் அதிகமிருக்கும், அதுவும் 3D படம் என்றதும் இன்னும் ஆர்வமாக மானிட்டர் அருகில் வந்து பலரும் சூழ்ந்து கொண்டு மானிட்டரை எட்டிப் பார்க்கின்றனர். இவர்களை கட்டுப்படுத்த செக்யூரிட்டிக்களை போட்டால், அவர்களும் சேர்ந்து கொண்டு மானிட்டரை ஆர்வமாக பார்க்கின்றனர். ஆனால், அவர்கள் எல்லோருக்கும் மானிட்டரில் தெரியும் பிம்பம் போதையில் பார்ப்பது போல் இரண்டிரண்டாக தெரியும். பிரத்யேக கண்ணாடி அணிந்து பார்த்தால் மட்டுமே அவை 3D எஃபெக்ட் தரும். நானும் ஹரியும் கண்ணாடிகளை அணிந்து கொண்டு பார்த்துக் கொண்டிருக்க, பின்னால் நிற்கும் பலரும் எங்களிடம் வந்து கண்ணாடியை போட்டு பார்க்க ஆர்வம் தெரிவிக்கின்றனர்.

நாங்கள் இப்படத்தை குழந்தைகள் படமாக எடுத்துவிடக்கூடாது என்ற முடிவில் எடுத்துக்கொண்டிருக்கிறோம். ஆனாலும், இன்னமும் வேடிக்கை பார்க்கும் கூட்டத்தில் பெரியவர்களை காட்டிலும் பல குழந்தைகள்தான் ஆர்வமாக பார்க்கிறார்கள்.

கல்லூரியில் ஒரு காதல் காட்சி படம்பிடித்து கொண்டிருந்தபோது ஒரு சிறுவன், 'அங்கிள்... அங்கிள்...? இது 3D படமா..?' என்று ஆர்வத்துடன் கண்கள் விரித்து கேட்டது மிகவும் மகிழ்ச்சியளித்தது, ஆனால் கூடவே எங்கள் இருவரது (நானும் ஹரியும்) மனதையும் அதிர்ச்சிக்குள்ளாக்கியது. அது ஏன் என்று பதிவின் முடிவில் சொல்கிறேன்.

எங்கள் படத்தின் கதாநாயகி சனம்
, படப்பிடிப்பில் இடைவேளையின்போது ஆப்பிள் சாப்பிட்டுக்கொண்டிருந்தார். அதை ஒரு நிருபர் படம் பிடித்து கொண்டிருந்தார். 'சாப்பிடும்போது படம் எடுக்க வேண்டாமே ப்ளீஸ்' என்று அவர் சொல்லி அந்த நிருபரை அனுப்பிவிட்டார். ஆனால், அன்று மாலையே, அவர் ஒரு கையில் ஆப்பிளுடன் பார்த்து சிரித்து கொண்டிருப்பது போன்ற அந்த புகைப்படம் ஒரு பத்திரிகையில் வெளியாகிவிட்டது, அனைவரும், கையில் ஆப்பிள் வைத்து கொண்டு அவர் முன்னே சென்று நின்று, அந்த புகைப்படத்தை காட்டி, அவரை வெறுப்பேற்றி கொண்டிருந்தோம்.

நேற்று ஒரு வெள்ளைக்காரர், ஒரு பெண்ணைப் பார்த்து 'நீ கேர்ப்பமாயிருக்கே..!' (நீ கர்ப்பமாயிருக்கே) என்று சொல்ல வேண்டிய காட்சி, ஆனால் அவர் அந்த பெண்ணுக்கு அருகில் நிற்கும் ஒரு ஆணிடம் 'நீ கேர்ப்பமாயிருக்கே..' என்று கூற, அவர் பதறியடித்து 'நானில்ல... நானில்ல..' என்று அலறவும். கூடியிருந்த குழு மொத்தமும் சிரித்துவிட்டது.

நேற்று திரு. பாலா சிங் அவர்கள், தான் நடித்து முடித்த காட்சியை 3D-யில் கண்டுகளித்து மிகவும் மகிழ்ச்சியடைந்தார். உடன் வந்திருந்த வெள்ளைக்கார துரையும் இப்படத்தை 'அங்கு அனுப்புங்கள் இங்கு அனுப்புங்கள்' என்று ஏகத்துக்கும் பரிந்துரைத்து கொண்டிருந்தது மகிழ்ச்சியளித்தது..!

Out of Topic
கேணிவனத்திற்கு தகவல்களை சேகரித்த விவரங்களை எழுதுவதாக கூறியிருந்தேன். அதை எழுதுவதற்கு போதிய நேரம் கிடைக்கவில்லை..! ஆனால் கண்டிப்பாக அந்த விவரங்களை 'கேணிவனம்' புத்தக வடிவில் வரும்போது இணைத்து எழுதுகிறேன். பிறகு பதிவிலும் பதிகிறேன்.

(அந்த சிறுவன் கேட்டதில் மகிழ்ச்சி + அதிர்ச்சி என்று சொல்லியிருந்தேன்.
மகி்ழ்ச்சி = அவன் ஆர்வத்துடன் கண்கள் விரித்து கேட்டது.
அதிர்ச்சி = 'அங்கிள்' என்று அழைத்தது.)

நட்புடன் இணைந்திருப்போம்..! நன்றி வணக்கம்..!

ஹரீஷ் நாராயண்

"அம்புலி 3D" படப்பிடிப்பு அனுபவம் 2-ஐப் படிக்க இங்கே க்ளிக்கவும்

"அம்புலி - 3D" A Steroscopic Thriller : எனது அடுத்த திரைப்படம்

2011-02-05T00:43:00.000+05:30

வலையுலக நண்பர்கள் அனைவருக்கும் வணக்கம்,

இன்று உங்களுடன் ஒரு நற்செய்தியை பகிர்ந்து கொள்வதில் மகிழ்ச்சியடைகிறேன்.

இன்று முதல்... "அம்புலி" என்ற 3D திரைப்படத்தின் படப்பிடிப்பை துவங்கியுள்ளோம். 20 வருடத்திற்கு பிறகு வரும் இந்த 3D திரைப்படத்தை குழந்தைகள் படம் போலல்லாமல், வளர்ந்த குழந்தைகளும் பார்க்கும் விதத்தில் படமாக்கவிருக்கிறோம்.

இப்படத்தின் முக்கிய சிறப்பம்சமாக, திரு. ரா. பார்த்திபன் அவர்கள், இதில் ஒரு பெரும்பங்காற்ற இருக்கிறார்.

KTVR CREATIVE REELS சார்பில் திரு. V. LOGANATHAN அவர்கள் தயாரிக்கிறார். நானும் எனது நண்பர் ஹரி ஷங்கரும் இப்படத்தை இயக்குகிறோம். எங்களது முந்தைய திரைப்படத்தை வித்தியாசமாக படம்பிடித்து கொடுத்த நண்பர் சதீஷ். G இப்படத்தின் ஒளிப்பதிவாளர்.

நீண்ட நாட்களாக பதிவை எழுத முடியவில்லையே என்றிருந்தேன். இனி, 'அம்புலி' படப்பிடிப்பில் நடக்கும் சில சுவாரஸ்யமான தகவல்களை பகிர்ந்து கொள்கிறேன்.

நட்புடன் இணைந்திருப்போம்..! நன்றி வணக்கம்..!

அன்புடன்

ஹரீஷ் நாராயண்

'ஓர் இரவு' - BEST INDEPENDENT FILM AWARD பெற்றது

2010-12-25T14:37:00.001+05:30

கடந்த 23ஆம் தேதி அன்று மாலை, சென்னை சர்வதேச திரைப்பட விழாவில் 'ஓர் இரவு' திரைப்படத்துக்கு BEST INDEPENDENT FILM 2010 என்ற விருது வழங்கப்பட்டது. வாழ்த்தி ஊக்கமளித்து வந்த அத்தனை நல்ல உள்ளங்களுக்கும் நன்றி..!

Photo Courtesy - Chennaionline, Kollytalk, Top10Cinema

திரைப்படவிழாவில் 'ஓர் இரவு' - திரைப்பட அனுபவம்

2010-12-19T09:49:00.000+05:30

வணக்கம் நண்பர்களே,

16ஆம் தேதி, லேசான தூறலுடன் தொடங்கிய மயக்கும் மாலை பொழுதில், நானும் எனது படக்குழுவினரும், அரங்கிற்கு வந்து சேர்ந்தோம். கூட்டம் மிக குறைவாகவே இருந்தது... வெளியே காலையில் எனது உதவி இயக்குனர் வந்து ஒட்டிவிட்டு சென்ற 'ஓர் இரவு' போஸ்டர் தெரிந்தது.

அரங்கினுள்ளே இன்னும் முந்தைய திரைப்படம் ஓடிக்கொண்டிருந்ததாக தெரிந்தது. காத்திருந்தோம். வெளியே கொஞ்சம் கொஞ்சமாக கூட்டம் வந்து சேர்ந்து கொண்டிருந்தது. ஒருசிலர், போஸ்டரை காட்டி, 'இது நல்ல படம்' என்று தம் நண்பர்களிடம் சான்று அறிவித்துக் கொண்டிருந்தது எங்களுக்கு தெம்பூட்டியது.

முந்தைய திரைப்படம் முடிந்து, கூட்டம் வெளியே வந்ததும், புதுக்கூட்டம் அரங்கிற்குள் நுழைந்துக் கொண்டிருந்தது. நாங்களும் உள்ளே சென்று, 'ஓர் இரவு' டிவிடி-ஐ ப்ரொஜெக்டர் ஆபரேட்டரிடம் கொடுத்து, சோதனை ஓட்டம் பார்த்துக் கொண்டோம்.

5.30 மணிக்கு, படம் போடுவதற்கு முன், ரேவதி மேடம் வந்து ஒரு சின்ன உரை நிகழ்த்தினார்கள். ''திரைப்படம் பார்க்கும்போது, தயவு செய்து, செல்ஃபோன் பேசுவதையோ, SMS அனுப்புவதையோ, எழுந்து வெளியே அடிக்கடி சென்றுவருவதையோ தவிருங்கள். அமைதியாக படத்தைப் பாருங்கள். கலாட்டா செய்து கொண்டு பார்ப்பதற்கு இது பொது திரையரங்கு அல்ல, நீங்களெல்லாம் தேர்ந்தெடுக்கப்பட்ட ஆடியன்ஸ் என்பதால், கண்ணியம் காத்திருங்கள்'' என்று மிகச்சுருக்கமாக பேசிவிட்டு சென்றார்கள்.

பிறகு ஒருவர் எங்களிடம் (3 இயக்குனர்கள் நான், ஹரி ஷங்கர் மற்றும் கிருஷ்ண சேகர்) வந்து, இயக்குனர் அறிமுகம் கொடுக்கலாமா..? ஏதாவது பேசுகிறீர்களா..? என்று கேட்டார். இல்லை சம்பிரதாயங்கள் வேண்டாம் முதலில் அனைவரும் படத்தை பார்க்கட்டும் என்று தவிர்த்துவிட்டோம்.

பிறகு, ஒரு இளம்பெண் 'ஓர் இரவு' திரைப்படத்தை பற்றி சின்ன அறிமுக உரையை நிகழ்த்திவிட்டு சென்றார். விளக்குகள் அணைக்கபட்டன, நாங்கள் மூவரும், முதல் வரிசையில் அமர்ந்து கொண்டோம். படம் திரையிடப்பட்டது.

நாங்கள் எதிர்ப்பார்த்தைவிட கூட்டம் நிரம்பி வழிந்தது. ரேவதி மேடம் கூறியது போல், அனைவரும் கண்ணியமாகவே படம் பார்த்தனர்.

சிறிது நேரம் கழித்து திரும்பி பார்த்தேன், அரங்கம் நிறைந்திருந்தோடில்லாமல், அதிகம் பேர், நின்று கொண்டும் படம் பார்த்து கொண்டிருந்தது மிகவும் ஊக்கமளித்தது.

7 இடங்களில் கைத்தட்டல்கள் எழுந்தது சந்தோஷமாக இருந்தது.

இரண்டு மணிநேர திரைதியானம் முடிந்து விளக்குகள் போடப்பட்டதும், மீண்டும் கைத்தட்டல், ஏதேதோ பேசியபடி அனைவரும் வெளியேறிக் கொண்டிருந்தனர். அதில் எங்களது பின்னால் வரிசையில் அமர்ந்திருந்த ஒருவர், எங்கள் மூவரில், 'கிருஷ்ண சேகர்' என்பவரை அடையாளம் கண்டுபிடித்தார் (அவர் ஒரு சின்ன வேடத்தில் நடித்திருந்ததால்). உடனே, எங்கள் மூவரையும் தெரிந்து கொண்டு, சூழ்ந்து கொண்டனர்.

அவர்களைத் தொடர்ந்து, VisCom மாணவர்கூட்டம் எங்களை சூழ்ந்துகொண்டது. இப்படிப்பட்ட படத்திற்கு ஏன் மிக குறைவான பப்ளிசிட்டி செய்தீர்கள் என்று கேட்டார்கள். மீண்டும் திரையிட்டால் எங்கள் ஆதரவு நிச்சயம் என்றார்கள். ஒரு சிலர் தமது கல்லூரியில் இப்படத்தை ஸ்பெஷல் ஸ்கீரினிங் செய்ய ஏற்பாடு செய்வதாக கூறி அனுமதி கேட்டார்கள். மேலும், மற்ற திரைப்பட விழாக்களுக்கும் தவறாமல் இப்படத்தை அனுப்பும்படி அன்புக்கட்டளையிட்டார்கள். அடுத்த படத்தை பற்றி ஆவலோடு விசாரித்தார்கள். சிலர் உதவி இயக்குனராக சேர்ந்து கொள்ள விருப்பம் தெரிவித்தார்கள். இப்படியாக, சுமார் 20 நிமிடங்கள் பேசிவிட்டு அவரவர்கள் விசிடிங் கார்டுகளை கொடுத்தும் வாங்கியும் சென்றது மிக மகிழ்ச்சியான அனுபவம்.

பிறகு, 3 CIFF Volunteer பெண்கள் 'ஓர் இரவு' பற்றி விழா தினசரியில் எழுதுவதற்காக பேட்டி எடுத்துவிட்டு சென்றனர்.

மறக்கமுடியாத அனுபவமாக அன்றைய மாலை அமைந்தது.

விழா தினசரியில் வெளியான 'ஓர் இரவு' திரையிடப்பட்ட அனுபவம் இதோ உங்களுக்காக..!

Source : http://www.chennaifilmfest.com/Issue4.pdf (page2)

பின்குறிப்பு - புகைப்படம் எடுக்க முடிவில்லை..! மன்னிக்கவும்..!

அன்புடன்

HARESH NARAYAN

'ஓர் இரவு' இன்று திரைப்படவிழாவில் திரையிடப்படுகிறது

2010-12-16T10:43:00.000+05:30

8ஆவது சர்வதேச திரைப்படவிழாவில் ''ஓர் இரவு'' திரைப்படம்

2010-12-14T09:53:00.001+05:30

அன்பர்களுக்கு வணக்கம்,

என் சார்பில் ஒரு நற்செய்தி..!

நான் இயக்கிய முதல் திரைப்படமான 'ஓர் இரவு' திரைப்படம், 8ஆவது சென்னை சர்வதேச திரைப்பட விழாவில் திரையிட தேர்வாகியுள்ளது என்பதை மகிழ்ச்சியுடன் தெரிவித்துக் கொள்கிறேன்.

உலக நாடுகளிலிருந்து சில அரிய படங்களை தேர்வு செய்து திரையிடப்படும் இந்த சர்வதேச திரைப்படவிழாவில் 12 தமிழ்ப்படங்கள் தேர்வாகியுள்ளது. அவை பின்பவருமாறு

1. ஓர் இரவு
2. பேராண்மை
3. அங்காடி தெரு
4. களவாணி
5. ஆயிரத்தில் ஒருவன்
6. மதராசப்பட்டிணம்
7. மைனா
8. விண்ணைத்தாண்டி வருவாயா
9. இரும்புக்கோட்டை முரட்டு சிங்கம்
10. கதை
11. திட்டக்குடி
12. நந்தலாலா

முழுப்பட்டியலை பார்க்க - http://www.chennaifilmfest.com/films.html

இதுவல்லாமல் 14 இந்தியமொழிப்படங்ளும், 44 அயல்நாட்டு திரைப்படங்களும் திரையிடப்படவுள்ளன. இந்த விழாவில் கலந்து கொள்ளவும் மேலும் பிற விவரங்களுக்கும் இந்த வலைதளத்தை பார்க்கவும் - www.chennaifilmfest.com

நான் எழுதிவரும் சிறுகதைகளுக்கும் தொடர்கதைகளுக்கும் தொடர்ந்து வாசித்து வாழ்த்தி ஊக்கமளித்து வருவதற்கு மிக்க நன்றி!

நட்புடன் இணைந்திருப்போம்..! நன்றி வணக்கம்..!

அன்புடன்
ஹரீஷ் நாராயண்
DREAMER

கேணிவனம் - சில கேள்வி பதில்கள்

2010-11-28T09:21:00.004+05:30

அனைவருக்கும் வணக்கம்,

ஆகஸ்டு 6ஆம் தேதி நான் 'கேணிவனம்' எழுத ஆரம்பித்திலிருந்து, நவம்பர் 24ஆம் தேதி வரை மொத்தம் 111 நாட்கள் தொடர்ந்து இக்கதையை பொறுமையாக காத்திருந்து 30 பாகங்களையும் படித்து வாழ்த்து தெரிவித்த அத்தனை நல்ல உள்ளங்களுக்கும் மிக்க நன்றி..!

கேணிவனம் குறித்து சில வாசக நண்பர்கள் மறுமொழியில் தொடர்ந்து கேட்ட கேள்விகளை இங்கு தொகுத்து பதிகிறேன்.

கேணிவனம் குறித்து உங்களது விமர்சனங்களையோ அல்லது வேறு சந்தேகங்களோ இருந்தால் தவறாமல் கேளுங்கள்..! (Email:- imhareeshnarayan@gmail.com)

கேணிவனம் குறித்து சில பொதுவான கேள்விகளும் அதற்கான பதில்கள்

கேள்வி:- தாஸூக்கு வயசாகும்போது அவர் மறுபடி டைம் டிராவல் செய்வாரா..? அவருடைய பிரதிதான் தாத்தா என்றால், அவர் இறந்தபின் அந்த வயதை எப்படி தாஸால் எட்ட முடியும்..? அல்லது சுருக்கமாக, 64 வயதுக்குப்பின் தாஸின் வாழ்வில் என்ன நடக்கும்?

விடை:- தாஸின் 64ஆவது வயதில் மீண்டும் இதே நடக்கும் என்று அர்த்தமில்லை..! ஏனென்றால், இப்போது நாம் கதையில் 1ஆம் மற்றும் 2ஆம் காலக்கட்டத்தை பார்த்ததுபோல், தாஸ் தாத்தாவாக பின்னோக்கி பயணித்து வந்தது என்பது மறைமுகமான 3ஆவது காலக்கட்டம். இப்போது நீங்கள் க்ளைமேக்ஸை தெரிந்து கொண்டு மீண்டும் இந்த கதையைப் படித்துப் பார்க்கும்போது, உங்களுக்கு இந்த மறைமுக காலக்கட்டம் பற்றி நன்றாகவே தெரியவரும். தாத்தாவின் ஒவ்வொரு வசனமும் இந்த 3ஆம் காலக்கட்டத்தை மனதில் வைத்துக்கொண்டு எழுதப்பட்டவை...!

கேள்வி:- கேணியில் விழுந்து தொலைந்து போன ப்ரொஃபஸர் கணேஷ்ராம் என்னவானார்..? அவர் இப்போது எந்த காலக்கட்டத்தில் இருக்கிறார்..?

விடை:- ப்ரொஃபஸர் கணேஷ்ராம் (1ஆம் காலக்கட்டத்தில் இருந்தவர்) தப்பான நோக்கத்தோடு வெற்றி பெற முயன்றபோது, கேணிக்குள் விழுந்து தொலைந்து போய்விட்டார்..! Lost in Time..! அவர் திரும்பி வருவது அசாத்தியம்.

கேள்வி:- நள்ளியைப் பற்றியும் இராஜசேகர வர்மனைப் பற்றியும் தாஸிடம் சொன்ன சித்தர், தாத்தாவைப்பற்றிய இரகசியத்தை சொல்லாமல் விட்டது ஏன்?
விடை:- நள்ளியைப் பற்றியும் இராஜசேகரவர்மனைப் பற்றியும் சொன்ன சித்தர், தாத்தாவை பற்றி சொல்லாததற்கு காரணம், நள்ளிக்கும்-தாஸூக்கும், இராஜசேகரவர்மனுக்கும்-தாஸூக்கும், எந்த ஒரு உணர்ச்சிகரமான சொந்தமுமில்லை..! அவனது முந்தைய பிறவிகளைப் பற்றி தெரிந்து கொள்வதில் தாஸூக்கு ஆச்சர்யமே தவிர வேறு எதுவும் உணர முடியாது. ஆனால், தாத்தாவைப் பற்றி சித்தர் சொன்னால், அவனுக்கு தாத்தாவுக்குமான Emotional Bonding பாதிக்கப்படும், இதனால், தாத்தா உயிருடன் இருக்கும்போதே அவன் அனாதையாக உணரக்கூடிய வாய்ப்பிருக்கிறது என்று முக்காலமும் உணர்ந்த சித்தர் ஊகித்திருந்ததால் இதைப்பற்றி தாஸிடம் கூறவில்லை...

கேள்வி:- தாத்தாவாகவும் தாஸே இருந்தும், தனது இளைய தாஸிடம் கேணிவனத்தை பற்றி முழுமையாக கூறாததற்கு காரணம் என்ன..?

விடை:- இதற்கு வெவ்வேறு காரணங்கள் உண்டு,
1. தாத்தா எதிர்காலத்தைப் பற்றி எதையும் கூறக்கூடாது என்று உறுதியெடுத்துக் கொண்டதனாலும்.
2. எதையும் தேடிக்கண்டுபிடிப்பதுதான் தாஸின் இயல்புத்தன்மை. அது மாறாமல் இருக்கவும் வேண்டும் என்றும்.
இருந்தாலும், தாத்தா பூடகமாக சில விஷயங்களை அவனுக்கு உணர்த்தி வந்திருப்பார் என்பது நீங்கள் மீண்டும் படித்துப் பார்த்தால் புரியும்.

கேள்வி:- தாஸ் காலத்துக்கு பின்நோக்கி வந்து வாழ்ந்தாரா அல்லது தன் காலத்துக்கு தசதரனை எடுத்துக் கொண்டு வந்தாரா?

விடை:- தசரதன் தாஸ் காலத்துக்கு பின்நோக்கி வந்து வாழ்ந்தார்.

கேள்வி:- தசரதன் மற்ற ஏழு கேணிகளையும் கண்டுபிடித்துவிட்டார் என்றால் அது அத்தனையுமே இந்தியாவில்தான் இருக்கிறதா..?

விடை:- இந்த கேள்விக்கு விடை அடுத்த பாகத்தின் கதை..!

கேள்வி:- மற்ற கேணிகளை உருவாக்கியவரும் சித்தர் தானா?

விடை:- ஆம், இந்த சித்தர்தான் அமைத்தார்... ஆனால் எப்படி என்பதற்கு விடை முந்தைய கேள்வியின் விடையே..!

கேள்வி:- அடுத்த பாகம் எப்போது..?

விடை:- இந்த பாகத்தை எழுத நான் எடுத்துக் கொண்ட 111 நாட்களில் பெரும்பாலும் முழுநேரமாக தகவல் சேகரிப்பு செய்திருக்கிறேன். ஆனால், தற்போது புதிய திரைப்படம் ஒன்றை துவங்கவிருப்பதால் (திரைப்படத்தின் விவரங்களை விரைவில் வெளியிடுகிறேன்), ஒரு நியாயமான இடைவெளிக்கு பிறகு, மே-2011-ல் அடுத்த தொடர்கதையை கண்டிப்பாக கேணிவனத்தைப் போலவே சுவாரஸ்யமாக எழுதுகிறேன்.

மேலும் கேள்விகள் திரண்டால், அதையும் தொகுத்து போடுகிறேன். அடுத்த பதிவில் வாசகர்கள் இமெயிலில் அனுப்பிய விமர்சனங்களை தொகுத்து போடுகிறேன்.

இக்கதைக்கான தகவல் சேகரிப்பில் எனக்கு பேருதவியாய் இருந்த புத்தகங்கள், ஆய்வுக்கட்டுரைகள், நண்பர்கள் போன்றவற்றின் தொகுப்பையும் விரைவில் போடுகிறேன்.

நட்புடன் இணைந்திருப்போம்..! நன்றி வணக்கம்..!

-
DREAMER

"கேணிவனம்" - பாகம் 30 - [இறுதிபாகம்]

2010-11-24T10:25:00.003+05:30

இக்கதையின் இதர பாகங்களை படிக்க

பாகம் - 01 பாகம் - 02 பாகம் - 03 பாகம் - 04 பாகம் - 05

பாகம் - 06 பாகம் - 07 பாகம் - 08 பாகம் - 09 பாகம் - 10

பாகம் - 11      பாகம் - 12         பாகம் - 13          பாகம் - 14         பாகம் - 15
பாகம் - 16    பாகம் - 17          பாகம் - 18    பாகம் - 19          பாகம் -20
பாகம் - 21    பாகம் - 22        பாகம் - 23          பாகம்-24          பாகம்-25
பாகம் - 26          பாகம்-27          பாகம்-28          பாகம்-29

--------------------------------------------------------------------

பாகம் - 30

ஆஸ்பத்திரியிலிருந்து டிஸ்சார்ஜ் செய்யப்பட்டு அந்த காலை வேலையில் தாஸ், சந்தோஷ், லிஷா மூவரும் காரில் சீறிக்கொண்டிருந்தனர். தாஸின் கையில், முன்னாள் இரவு, சந்தோஷ் வீடியோவில் கண்டெடுத்த சித்தரின் பாடல் ப்ரிண்ட் அவுட் இருந்தது. அதை தாஸ் ஆவலுடன் படித்துக் கொண்டிருந்தான்.

என்கண் நிறையிறை யவன்
எண்கண்ணு வுடையவனா ஆனதில்
நான் முகனவன் முகமதில்
நாரெண் டெட்டாம் கண்
நீகண்ட ததுவொன்றெனி
லெஞ்சியுள தேழென வெடுத்துரைத்தேன்
எனதா ஆசனுக்கு

என்று சித்தர் எழுதிய இப்பாடலை பார்த்தபடி தாஸ் காரில் சீறிக்கொண்டிருந்தான். தாஸ் அந்த பாடலுக்கு மனதினில் உரையெழுதிக் கொண்டிருந்தான்.

'பாஸ்..? இந்த பாடலோட பொருள் உங்களுக்கு ஏதாவது புரியுதா..?' என்று கேட்டான்

'புரியற மாதிரித்தான் இருக்கு கொஞ்சம் டைம் கொடு... சொல்லிடுறேன்..'

'நான் வேணும்னா ஹெல்ப் பண்ண்டடுமா..?' என்று லிஷா கேட்டாள்

'இல்ல லிஷா... ஜஸ்ட் கிவ் மி ஃப்யூ மினட்ஸ்..' என்று மீண்டும் பாட்டில் லயித்தான்.

சில நிமிடங்கள், சாலையோடு சேர்ந்து கரைந்தது...

சந்தோஷ், தான் கொண்டு வந்திருந்த புது பேட்டரியை தாஸின் செல்ஃபோனில் பொருத்திக் கொண்டிருந்தான்.

தாஸூக்குள் ஒரு தெளிவு... பாடலின் பொருளை பிடித்துவிட்டான். சித்தர் கூறிவிட்டு சென்ற மாபெரும் ரகசியமது என்று தெரிந்து கொண்டான்.

ஆனால் கார் தாஸின் ஆஃபீசை இதற்குள் நெருங்கி விடவே, மூவரும் இறங்கி... நீண்ட நாட்களாக பூட்டியிருந்த தாஸின் 'Ancient Park'-இனுள் நுழைந்தனர்.

தாஸின் ஆஃபீஸறையில் நுழைந்து, ஏஸியை போட்டு, மிதமான ஆரஞ்சு வெளிச்சத்தில் அமர்ந்தனர்.

'என்ன பாஸ்... பாட்டு என்னன்னு தெரிஞ்சுதா..?' என்று மீண்டும் சந்தோஷ் ஆவர்மாய் கேட்க, சூழலை சுவாரஸ்யமாக்கும்பொருட்டு தாஸ் சிரித்தபடி லிஷாவிடம்...

'பாட்டுல என்ன இருக்குன்னு சொல்லணும்னா, லிஷா நீ போய் 3 பேருக்கும் காஃபி கொண்டுவா...' என்று கூற, லிஷா அந்த பாடலின் பொருளை தெரிந்து கொள்ளும் ஆர்வத்துடன் எழுந்து சென்றாள்.

அடுத்ததாக சந்தோஷிடம் திரும்பி, 'நீ என்ன பண்றேன்னா, இந்த சித்தர் பாட்டோட ப்ரிண்ட் அவுட்-ஐ ஸ்கீர்ன்ல ப்ரொஜெக்ட் பண்ணு..' என்றான். சந்தோஷ் எழுந்து தனது பெண்-டிரைவில் இருந்த அந்த சித்தர் பாடல் கொண்ட ஸ்க்ரீன்ஷாட் ஃபோட்டோவை லேப்டாப்பினில் இணைத்து, சுவற்றில் மாட்டப்பட்டிருந்த பெரிய திரையில் ரிஃப்ளெக்ட் ஆகும்படி ப்ரொஜெக்ட் செய்தான்...

லிஷா இதற்குள், காஃபி மெஷினிலிருந்து, சுடச்சுட 3 காஃபியை கொண்டு வந்து கொடுத்தாள்.

மூவரும் அமர்ந்து காஃபியை குடித்தனர். தாஸ் எழுந்து சென்று ஒரு போர்டு மார்க்கர் எடுத்துக் கொண்டான்.

திரையில் தெரிந்து கொண்டிருக்கும் சித்தர் பாடலை அந்த போர்டிலேயே மார்க் செய்தபடி கீழ்கண்டவாறு எழுதி காட்டியபடி பொருள் உரைத்தான்.

என் கண் நிறை இறை அவன் (பிரம்மா)

'என் கண் நிறைந்த கடவுள் அப்படின்னு தன்னோட கடவுள் பிரம்மாவைப் பத்தி சொல்றாரு..' என்று தொடர்ந்து எழுதினான்

எண் (8) கண் உடையவன் ஆனதில்

'அந்த பிரம்மா கடவுள் 8 கண் உடையவருன்னு சொல்றாரு...'

நான்முகன் = பிரம்மா முகம் அதில்

'4 முகம் கொண்ட பிரம்மாவுக்கு...'

நாரெண்டு எட்டு உள்ளதாம் கண் (4X2=8)

'4X2 எட்டு கண்ணு இருக்கிறதால...'

நீ கண்டதது ஒன்றெனில்

'நீ பாத்தது ஒண்ணுதான்...'

எஞ்சியுள்ளது ஏழு என எடுத்துரைத்தேன்

'இன்னும் மிச்சமிருக்கிறது 7 இருக்குன்னு சொல்றாரு...'

என் தாசனுக்கு

'தாசன்-னா..? சீடன்..! தன்னோட சீடனுக்கு சொல்ற மாதிரி எழுதியிருக்காரு...' இல்லை மறைமுகமா சீடனுக்கு சொல்ற மாதிரி எனக்கும் சொல்லியிருக்கலாம். ஏன்னா என்னையும் தாஸ்-னுதான் அவர் கூப்பிட்டாரு...' என்று தாஸ் கூறி முடித்து காஃபியைத் தொடர்ந்தான்.

லிஷா ஆச்சர்யத்துடன் கேட்டாள்.., 'தாஸ்... இது உண்மையா..?'

'உண்மையா இருக்கிறதாலத்தானே எழுதியிருக்காரு..?' என்று தாஸ் அவளுக்கு பதிலளிக்க, சந்தோஷ் சற்று புரியாமல் விழித்தான்.

'என்னது உண்மையான்னு பேசிக்குறீங்க..? எனக்கு புரியல..?'

'அடப்பாவி சேண்டி, இதுகூடவா புரியல...? உன்னை கட்டிக்கிட்டு நான் எப்படித்தான் காலந்தள்ள போறேனோ..' என்று அவனை லிஷா செல்லமாய் திட்டினாள்...

'நம்ம சண்டைய அப்புறம் வச்சிக்கலாம் டியர்... நீ இப்ப என்ன விஷயத்தை உண்மையான்னு ஆச்சர்யமா கேட்டே..?'

'டேய், அந்த சித்தர் கேணிவனத்தைத்தான் பிரம்மாவோட கண்ணுன்னு ஏற்கனவே சொல்லியிருக்காருல்ல... இப்போ இந்த பாட்டு, நாம பாத்தது ஒரு கண்ணுதான், ஆனா, மொத்தம் 8 கண்ணு, அதுல ஒண்ணு போக மிச்சம் இன்னும் 7 கேணி இருக்கிறதா சொல்லியிருக்காரு... கரெக்டா தாஸ்..?' என்று தாஸை கேட்டாள்

'பர்ஃபெக்ட்லி ரைட் லிஷா...' என்று கூறினான். இப்போது சந்தோஷூம் ஆச்சர்யத்தில் மூழ்கினான்.

'பாஸ்... ஒரு கேணிவனத்துக்கே நாம் இவ்வளவு பாடுபட்டோம். அப்போ இன்னும் 7 இருக்கா..' என்று கேட்டான்

தாஸ் அதற்கு கண்களால் ஆம் என்று பதிலளித்தபடி அந்த பாடலையே பார்த்துக் கொண்டிருந்தான்.

'பாஸ், இது எங்கேயிருக்கும்னு உங்ககிட்ட நேர்ல பேசும்போது ஏதாவது அந்த சித்தர் சொல்லியிருக்காரா..?'

'எங்கேயிருக்குன்னு சொல்லலை, ஆனா, அதோட தன்மையை மறைமுகமா சொல்லியிருந்தாரு... உன் பிறவியில் உன்னை நீயே பார்க்க 'இந்த' காலத்துவாரத்தில் முடியாது-ன்னு சொன்னாரு... அப்போ அதுக்கு என்ன அர்த்தம், மத்த கேணியில இந்த விஷயம் சாத்தியம்னுதானே..! ஆனா, அது அப்போ புரியல... இப்போத்தான் புரியுது..' என்றான்.

'பாஸ், அப்போ, மத்த கேணியில ஒவ்வொரு கேணிக்கும் ஒவ்வொரு ஸ்பெஷாலிட்டி இருக்கும்னு சொல்றீங்களா..?'

'ஆமா...'

'எங்கேன்னு போயி தாஸ் இதெல்லாம் தேடுறது...' என்று லிஷாவும் ஆர்வத்துடன் கேட்டாள்

'எங்கே வேணும்னாலும் இருக்கலாம் லிஷா... இனிமே பழைய கோவிலுங்களுக்கு போனா, அங்கே கிணறு ஏதாவது மூடியிருக்கான்னு பாக்கணும்... அதுல எந்த கிணறும் காலத்துவார கேணியா இருக்கலாம்..? இது ஜஸ்ட் ஒரு கெஸ்ஸிங்-தான்'

'பாஸ்... எனக்கு தெரிஞ்சு திருவொற்றியூர்ல ஒரு கோவில்ல ஒரு கிணறு மூடியிருக்கும்... ஆனா, அதுக்கு அவங்க வேற காரணம் சொல்றாங்க... அதாவது, கண்ணகி மதுரையை எரிச்சிட்டு கோபமா அங்க வந்தப்போ அவங்களை ஏதோ ட்ரிக் பண்ணி அந்த கிணத்துக்குள்ள போட்டு அடச்சிட்டாங்களாம்... சினம் குறையாத கண்ணகி இன்னும் அந்த கிணத்துக்குள்ள இருக்கிறதாவும், அதை திறந்தா, மறுபடியும் கோபத்தோட வந்து உலகத்தையே எரிச்சிடுவாங்கன்னும் சொல்றாங்க...'

'இந்த பழங்கதைகள் எல்லாம், கேக்குறதுக்கு சுவாரஸ்யமாவும் நம்பறதுக்கு கஷ்டமாவும் இருக்கும். ஆனா, ஒவ்வொரு கதைக்கு பின்னாடியும் அந்த கதைக்கு துளியும் சம்மந்தமில்லாத ஏதோ ஒரு பெரிய உண்மை மறைஞ்சியிருக்கும். உதாரணத்துக்கு இப்போ, இந்த கண்ணகி கிணறுக்குள்ள காலத்துவாரம் இருக்குன்னே வச்சிக்கோங்க... அதை ஓபனா சொல்லாம இப்படி ஒரு புனைவுக்கதையை வச்சி சொல்லியிருக்கலாமில்லியா... இதுவும் ஒரு ப்ளைண்ட் அஸெம்ப்ஷன்தான். நம்மளை சுத்தி நம்ம முன்னோர்கள் விட்டுட்டு போன எத்தனையோ ரகசியங்கள் இருக்கு... அது ஒவ்வொன்னும் ஒவ்வொருவிதத்துல ஒரு பொக்கிஷம்தான்... நாம முன்னோர்களையும் மறந்துட்டோம் பொக்கிஷத்தையும் தொலைச்சிட்டோம். இன்னைக்கு எத்தனையோ தாத்தாக்கள் விட்டுட்டு போன மருத்துவ குறிப்புக்கள்லாம் பொட்டலம் சுத்துற பேப்பரா தொலைஞ்சி இருக்கு...' என்று தாஸ் மிகவும் ஃபீலிங்குடன் பேசிக்கொண்டிருக்கும்போது அவனது செல்ஃபோன் ஒலித்தது...

ரிங்டோன் பாடல்
வந்த நாள் முதல் இந்த நாள் வரை
வானம் மாறவில்லை - வான்
மதியும் மீனும் கடல் காற்றும்
மலரும் மண்ணும் கொடியும் சோலையும்
நதியும் மாறவில்லை!

டிஸ்ப்ளேவில் ஓல்டு ஃப்ரெண்டு என்று வந்தது...

அட..! தாத்தா..! என்று குதூகலத்துடன் ஃபோன் எடுத்தான்.

'ஹலோ... தாத்தா..?' என்று தாஸ் ஆனந்தமாக ஆரம்பிக்க, மறுமுனையில் சுசீலாம்மா...

'தம்பி, நான் சுசீலா பேசுறேம்ப்பா..?'

'சுசீலாம்மா..? சொல்லுங்க..'

'தா... தாத்தாவுக்கு, ரொம்ப முடியலப்பா... நான் நேத்துலருந்து உங்கிட்ட பேச பாக்குறேன். உன்னை பிடிக்கவே முடியல... சீ..சீக்கிரம் வந்துடுப்பா... எதுவும் நடக்கும்போலருக்கு...' என்று பூடகமாய் சொல்ல... தாஸ் புரிந்து கொண்டான்.

'நா... நான்... வர்றேம்மா... இ..இப்பவே வர்றேன்...' என்றான்

----------------------------------------

கந்தன் கொள்ளை கிராமத்தில்...

தாத்தாவின் அறையில் தாஸ், சந்தோஷ் மற்றும் லிஷா இருந்தனர்... சுசிலாம்மா சுவரோரமாக சாய்ந்தபடி நின்றிருந்தார்.

தாஸ் கட்டிலில் படுத்திருக்கும் தாத்தாவை சமீபித்து அமர்ந்தான்...

'தா... தாத்தா..' என்றான்.

அவர் சுயநினைவு தப்பியவராயிருந்தார். தாஸ் அழுதான். லிஷாவும் சந்தோஷூம் அருகில் வந்து அவனை தேற்றினார்கள்.

சுசீலாம்மா மெல்லிய குரலில் புலம்பினாள்.

'உன்னிய பாக்கணும்னு துடியாக் கெடந்தாரு தம்பி... மனுசன் ஒருதடவை உன்னிய பாத்துட்டாருன்னா நிம்மதியாயிடும்... இப்போ நீ வந்தும் முழிப்பில்லாம போச்சேன்னுதான் கஷ்டமாயிருக்கு..' என்று கூறினாள்

தாஸூக்குள் மிகவும் குற்றவுணர்வாய் இருந்தது... தாஸ் சிறுவயதிலிருந்து தாய் தந்தையில்லாமல் தாத்தாவுடன் மட்டுமே வளர்ந்தவன். ஆனால், தாய் தந்தை பாசத்தை உணராத குறை எள்ளளவும் இல்லாதபடி தன்னை வளர்த்த தாத்தா இப்போது இப்படி சுயநினைவில்லாமல் ஜடமாய் கிடப்பது மிகவும் வேதனையளித்தது...

நான் மட்டும் கேணிவனத்துக்கு பயணப்படாமலிருந்திருந்தால், இப்போது தாத்தாவுடன் பேசியிருந்திருக்கலாம். கடைசி காலத்தில் மனிதன் தன்னுடன் என்னவெல்லாம் பேச ஆசை பட்டிருப்பார். எப்போதுமே என்னுடன் வந்து சில நாட்களாவது தங்கிவிட்டுப் போ என்று கெஞ்சி கெஞ்சி கேட்பாரே... சே..! என்ன பேரன் நான்... இவருக்கு என்ன கைமாறு செய்திருக்கிறேன். இவரை விட்டுப் பிரிந்து இத்தனை வருடங்களாய் வேலை! எழுத்து! புத்தகம்! என்று இவரை மறந்தேவிட்டேனே..! என்று மனதிற்குள் தன்னைத் தானே தாஸ் ஏகத்துக்கும் திட்டி தீர்த்துக் கொண்டிருந்தான்.

திடீரென்று சடகோப சித்தரின் ஞாபகம் வந்தது.. மனதால் அவரிடம் பிரார்த்தனை செய்தான்.

ஐயா..! சித்தரே..! உன்னைப் பார்க்கத்தானே, நான் இவரை புறக்கணித்து வந்தேன். இப்படி எங்களிருவரையும் பேசவிடாமல் செய்தல் நியாயமா..! எனது அன்புக்குறிய தாத்தாவிட்ம நான் பேச வேண்டும்... எப்படியாவது எனக்கு உதவி செய்யுங்கள்..! உங்களுக்கு கோடி புண்ணியம்..! என்று அவன் மனதிற்குள் நடத்தும் பிரார்த்தனைக்கு கண்களில் கண்ணீர் வழிந்துக் கொண்டிருந்தது...

திடீரென்று தாத்தா பேசினார்...

'தா..ஆஆஆ...ஸ்ஸ்...' என்று மிகவும் மெல்லிய குரலில் வார்த்தை வந்தது

தாஸ் அவர் கைகளை கெட்டியாக பிடித்தான்.

'தாத்தா... ஓ..ஓல்டு ஃப்ரெண்டு... நா.. நான் வந்துட்டேன்...' என்றான்

'தா..ஆஆ...ஆஸ்.ஸ்...' என்றார்

சுசீலாம்மா முகம் மலர்ந்தாள். நல்லவேளை இரண்டு பேரும் பேசிக் கொள்கிறார்கள் என்ற மகிழ்ச்சி அது...

தாத்தா தனது மெல்லி குரல்களில் தாஸ்க்கு மட்டும் கேட்கும்படி ஏதோ சொன்னார்

'நா... நான்... ஒரு அ..நாதை... ரொ...ம்ம்.. ப.... க..ஸ்டப்பட்... வளந்தேன்.. நிறைய... சாதி..ச்சேன்...'

அவர் சொல்வது புரிந்தாலும், அவர் சொல்லும் விஷயம் புதிது என்பதால் தாஸ் குழம்பியபடி 'தாத்தா..?' என்றான்

'ஆ..னா... நா..ன்... அநாதை... நீ... அநாத ஆயிடக்கூடா..து...ன்னுதான்... நா... நான்...தி..திரும்பி... வந்தேன்...' என்றார்

தாஸூக்கு ஒன்றும் புரியவில்லை...

'உன்ன... பாசமா... நானே... வளத்தேன்...'

'தாத்தா..?'

'நா..நான்... உ..உன்... தாத்தா.. இ...ல்ல...'

'தாத்தா... என்ன சொல்றீங்க.. தாத்தா... அப்போ நீ..நீங்க... யாரு...' என்று கண்களில் நீர்வழிந்தபடி கேட்டான்

அவர் மிகவும் பிரயத்தனத்துடன், தனது இடதுகையை தன் தலையணைக்கு கொண்டு செல்ல முயன்றார்... அவர் கைகளில் சக்தியற்று தலையணையை எட்ட முடியாமல் தவித்தது.. தாஸ் அவர் எதையோ எடுக்க முயல்வதை புரிந்துக் கொண்டு அவர் தலையணையை கொஞ்சமாக எடுத்துப் பார்த்தான். அங்கே ஒரு குட்டி சாவி இருந்தது...

'சாவியா..? இந்த சாவியா..! இதோ இதோ..' என்று அதை எடுத்து அவர் கண்முன் காட்டினான்.

'அவர் தனது கைகளை தாஸின் கைகளில் வைத்து அழுத்தி, அந்த சாவியை பத்திரமாக வைத்துக் கொள்ளும்படி அவன் கையை மூடினார். பிறகு மெல்லிய குரலில்

'நா...ன்.... நீ...' என்று கூறியபடி மூச்சை துறந்தார்...

சுசீலாம்மா ஓவென்று அலறினாள். தாஸ்க்கு அவர்கூறிய கடைசி வார்த்தைகள் இன்னமும் ஓடிக்கொண்டிருந்தது... அதற்கு என்ன அர்த்தம்... என்று யோசித்தபடி தனது கைகளிலிருக்கும் சாவியைப் பார்த்தான்... மெல்ல எழுந்தான்.

சுசீலாம்மா தொடர்ந்து அழுதுக் கொண்டிருக்க... லிஷா அவளை தாங்கலாக பிடித்துக் கொண்டு தேற்றிக்கொண்டிருந்தாள். சந்தோஷ் அமைதியாக ஓரமாக நின்றிருந்தான்.

தாஸ் அந்த அறையை சுற்றி சுற்றி பார்த்தான். அறையின் ஓரத்தில், தாத்தாவின் மரபீரோ கம்பீரமிழந்து 'எனது எஜமான் இறந்துவிட்டான்' என்பது போல் தாத்தாவின் மரணத்திற்கு வருத்தம் தெரிவித்தபடி நின்றிருந்தது.

அதை சமீபித்தான்.

மெல்ல அதை திறந்தான்.

உள்ளே, ஒரு லாக்கர் அறை போல் இருந்தது...

அதையும் திறந்தான்.

உள்ளே பணம் வைக்கும் இரும்பு பெட்டி ஒன்று இருந்தது...

தனது கையிலிருக்கும் சாவியை அந்த பெட்டியில் பொருத்தி பார்த்தான்.

திறந்துக் கொண்டது...

உள்ளே..! ஒரு பழைய புத்தகமும் ஒரு கடிதமும் இருந்தது...

அந்த புத்தகத்தை பிரித்துப் படித்தான். அது நேற்றிரவு தாஸ் ஆஸ்பிடலில் எழுத ஆரம்பித்த கேணிவனம் புத்தகம். நேற்று இரவு வரை ஐந்தரை பாகம் மட்டுமே எழுதி முடித்த புத்தகம் இன்று முழு புத்தகமாய் அவன் கையில்...

குழம்பினான். உடனிருந்த கடிதத்தை பிரித்து படித்தான்.

'அன்புள்ள என் பிரதி தாசுக்கு,

சிறுவயதில் அநாதையாக வளர்ந்த எனக்கு பாசம் நேசம் போன்ற அந்நிய வார்த்தைகள் மீது ஆசை வந்தது... வாழ்வில் எத்தனையோ விஷயங்களை சாதிக்க துடித்தேன். அதில் சிலவற்றை செய்தும் முடித்தேன். ஆனாலும், இன்னொருவர் அரவணைப்பில் அன்பில் திளைப்பதுமென்பது கடவுள் போல் கண்ணுக்கு தெரியாத பொருளாகவே இருந்தது... இந்நிலையில் என் இளமைக்காலத்தில் கேணிவனத்தின் மூலம் காலத்துவாரம் என்ற மாபெரும் பொக்கிஷம் எனக்கு தெரியக் கிடைத்தது... அதுவும் ஒன்றல்ல ஏழு என்பது தெரிந்து, அதில் என் வாழ்நாட்களில் நான்கு காலத்துவாரங்களை கண்டுகொண்டேன்.

கல்யாணம் செய்து கொண்டேன். துணைவியின் மூலம் அன்பும் ஒரு அன்பான மகனும் கிடைத்தான். ஆனால், ஒரு விபத்தில் சீக்கிரமே இருவரும் மீண்டும் என்னை பிரிந்து சென்றார்கள். நான் நினைத்தால் அவர்களை கேணிவனத்தை பிரயோகித்து காப்பாற்றியிருக்கலாம். ஆனால், நான் சித்தருக்கு அளித்த வாக்கின்படி, அவசியமில்லாமல் இயற்கை நிகழ்வுகளை மாற்றியமைக்க கூடாது என்பதில் திண்ணமாய் இருந்துவிட்டேன். மனைவி மகனின் அன்பை மறக்க, என்னை முழுமையாக பயணங்களில் ஈடுபடுத்திக் கொண்டேன். பல அரிய பொக்கிஷங்களை கண்டெடுத்தேன். பல்வேறு பகுதிகளுக்கு பலவருடங்கள் பயணித்தேன். எனது வாழ்க்கையில் பயணமும், சாகசமும் பஞ்சமில்லாமல் நிகழ்ந்தது..! எனக்கேற்பட்ட பஞ்சமெல்லாம் பாசத்திற்குத்தான்.

அந்நேரத்தில் பாசத்துக்கு துடிக்கும் இன்னொரு குழந்தையை தத்தெடுத்து வளர்க்க முடிவெடுத்தேன். அப்போதுதான் எனக்கு ஒரு புதிய யோசனை தோன்றியது..! யாரோ ஒருவரை தத்தெடுப்பதற்கு நானே என்னை ஏன் தத்தெடுத்து வளர்க்க கூடாது என்று தோன்றியது... நான் கண்டுபிடித்த காலத்துவாரங்களில் 4ஆவது கேணியின் வாயிலாக எனது பிரதியை நான் நோக்கும் விதமாய், எனது 64 வயதிலிருந்து 60 வருடம் பின்னோக்கி எனது 4ஆம் வயதிற்கு காலப்பயணம் மேற்கொண்டேன். நானே அநாதையாக இருக்கும் உன்னை தத்தெடுத்து தாத்தாவாய் வளர்த்தேன். நானான உன்னின் மீது பாசத்தை பொழிந்து அன்பும் கணிவும் கொடுத்து வளர்த்தேன்.

உன் வாழ்வில் இன்னும் நிறைய அனுபவங்கள் உனக்கு கிடைக்கவிருக்கிறது. நான் எதிர்காலத்திலிருந்து வந்ததற்கு அடையாளமாய் நான் கொண்டு வந்ததெல்லாம் ஒரே ஒரு பொருள்தான்.. அது நான்(நீ) எழுதிய கேணிவனம் என்ற புத்தகம்தான். இதில் நான் புனைந்து எழுதிய சில விஷயங்கள், அடுத்த 7 கேணியைத் தேட உனக்கு மிகவும் உபயோகமாய் இருக்கும்..! நடக்கப்போவதை நடந்திருந்து பார்..! என்று சித்தர் கூறியதை மறவாதே..! நான் எதிர்காலத்தில் நடக்கப்போவதை உனக்கு ஆருடம் சொல்லப்போவதில்லை..! ஆனால், எதிர்காலம் நிகழ்காலத்தைவிட மிகவும் மோசமானதாய் இருக்கும்... இந்த வாக்கியம் எந்த காலக்கட்டத்திற்கும் பொருந்தும். எதிர்காலத்தை எதிர்கொள்ளும் துணிச்சலையும் திடத்தையும் வளர்த்துக் கொள்வதுதான் பரிணாம வளர்ச்சி..! அது இயற்கை உனக்கு கொடுக்கும்.

இப்படிக்கு அன்புடன்
நீ..!'

கடிதத்தை படித்து முடித்து திரும்பி கட்டிலில் இறந்துக் கிடக்கும் தாத்தாவைப் பார்த்தான். உடம்பெல்லாம் மயிர்கூச்செரிவது போலிருந்தது...

லிஷா ஒருமுறை 'உங்க தாத்தா ஜாடை அப்படியே உங்கிட்ட இருக்கு..' என்று சொன்னதும்...

'இவர்தான் என் தாத்தா, இவர் பேர் தசரதன். இவரு பேரைத்தான் எனக்கு வச்சிருக்காங்க...' என்று தாஸ் பலரிடம் கூறியதும் நினைவுக்கு வந்தது...

பயங்கரமாக அழுகை வந்தது... ஓடிச்சென்று அவர் பாதங்களைப் கட்டிப் பிடித்துக் கொண்டு அழுதான்.

'நீ யாராக இருந்தாலும், எனக்கு நீ தாத்தாதான். இத்தனை வருடமும், அன்பில் திளைக்க செய்த நீ என் தாத்தாதான். தமிழை கற்றுக் கொடுத்தாய், சைக்கிள் ஓட்ட கற்றுக்கொடுத்ததாய், பள்ளிக்கு என்னுடன் நடந்து வந்தாய், கோவில்களுக்கு அழைத்து சென்று சிற்பங்களின் மேன்மைகளை புகட்டினாய்... இப்படி அரிய பல விஷயங்களை அன்புடன் கற்றுக் கொடுத்த நீ என் தாத்தாதான்' என்று கதறியழுதான்.

அருகிலிருந்த அனைவரும் தாஸ் இப்படி அழுவதை புரியாமல் பார்த்துக் கொண்டிருந்தனர்.

தாஸ் அவர் கால்களை கட்டிப்பிடித்தபடி அழுதுமுடித்து மெல்ல நிமிர்ந்தான்.

அவர் உள்ளங்கால் இரண்டிலும், 12ஆம் நூற்றாண்டில் நள்ளி-யால் வரையப்பட்ட அதே தோல்சித்திரம்...

- நிறைவு -

இதுநாள் வரையிலும் இத்தொடரை பொறுமையாக வாசித்து வாழ்த்திய அனைத்து நல்லுள்ளங்களுக்கும் மிக்க நன்றி...

"கேணிவனம்" - பாகம் 29 - [தொடர்கதை]

2010-11-20T17:35:00.000+05:30

இக்கதையின் இதர பாகங்களை படிக்க

பாகம் - 01 பாகம் - 02 பாகம் - 03 பாகம் - 04 பாகம் - 05

பாகம் - 06 பாகம் - 07 பாகம் - 08 பாகம் - 09 பாகம் - 10

பாகம் - 11      பாகம் - 12         பாகம் - 13          பாகம் - 14         பாகம் - 15
பாகம் - 16    பாகம் - 17          பாகம் - 18    பாகம் - 19          பாகம் -20
பாகம் - 21    பாகம் - 22        பாகம் - 23          பாகம்-24          பாகம்-25
பாகம் - 26          பாகம்-27          பாகம்-28

--------------------------------------------------------------------

பாகம் - 29

2ஆம் காலக்கோட்டில் நடந்துக் கொண்டிருப்பது...

இதுவரை தாஸின் லேப்டாப் திரையில், ஹேண்டிகேமிராவில் பதிவான 12ஆம் நூற்றாண்டு காட்சிகளையும், 1ஆம் காலக்கட்டத்தில் நடந்ததாக தாஸ் கூறியதையும் ஆச்சர்யத்துடன் கேட்டுக் கொண்டிருந்த லிஷாவும், சந்தோஷூம் கொஞ்சம் கொஞ்சமாக இயல்புநிலைக்கு திரும்பிக் கொண்டிருந்தனர்.

'பாஸ்... என்னென்னவோ நடந்திருக்கு..! எங்க உயிரையே காப்பாத்தியிருக்கீங்க..! உங்களுக்கு எப்படி நன்றி சொல்றதுன்ன தெரியல பாஸ்..!' என்று சந்தோஷ் செண்டிமெண்டாக ஆரம்பித்தான்.

'நன்றி சொல்ல வேண்டியதெல்லாம் அந்த சித்தருக்குத்தான். இப்படி ஒரு கேணி இருக்கிறதாலதான் இதெல்லாம் சாத்தியமாச்சு.!' என்று தாஸ் சித்தரை நினைவுக்கூர்ந்தான்.

'ஆமா தாஸ், இந்த கேணிவனம் உண்மையிலேயே ஒரு டைம் ட்ரெஷர்-தான்' என்று லிஷாவும் கூறினாள்.

'பாஸ், இப்போதான் உங்ககிட்ட கேணிவனம் இருக்கிறதுக்கான எல்லா வகையான ஆதாரமும் இருக்கே..! வீடியோ கேமிராவுல 12ஆம் நூற்றாண்டு காட்சிகளும் பிடிச்சிட்டு வந்துட்டீங்க..! இதையெல்லாம் வச்சி இனி கேணிவனத்தை கவர்மெண்ட்கிட்ட ப்ரூஃப்-ஓட சொல்லிடலாமே..! உங்க பேரு எங்கேயோ போயிடுமே பாஸ்..?' என்று கூற

தாஸ் பேசாமலிருந்தான். அவன் மௌனத்தை கண்ட லிஷாவும் சந்தோஷூக்கு சப்போர்ட்டுக்கு வந்தாள்

'தாஸ், சேண்டி சொல்றதுதான் கரெக்ட்-னு எனக்கும் தோணுது..! இதுக்கு மேலயும் இந்த விஷயத்தை மறைச்சி வைக்கணுமா, இந்த விஷயம் வெட்ட வெளிச்சமாக வேண்டாம்னு நினைச்சா, டாப் சீக்ரெட்-ஆ வேணும்னா மிலிட்டரியில கூட சொல்ல்லாமே..!' என்று தன் பங்குக்கு கூறினாள்.

'இல்ல லிஷா, அந்த சித்தர் இந்த கேணிவனத்தை உருவாக்குன நோக்கத்தை கேட்டதுக்கப்புறம் இந்த விஷயத்தை வெளியே சொல்லணுமான்னு தோணுது..?'

'ஏன்..?'

'அரசர்களுக்கு மத்தியில போர் வராம நிறுத்துறதுக்கு அந்த சித்தர் உருவாக்கின இந்த கேணிவனத்தை பத்தி இப்போ நாம வெளியே சொன்னா, வருங்காலத்துல இதை சொந்தமாக்கிக்கிறதுக்கு, நாடுகளுக்கு மத்தியிலியே ஒரு போர் வந்தாலும் வரலாம்...'

'என்ன பாஸ் சொல்றீங்க..?'

'ஆமா, கஜினி முகம்மது நம்ம நாட்டுக்குள்ள படையெடுத்தது எதுக்கு, நாட்டை ஆளுறதுக்கா..? சோமசுந்தரேஸவரர் கோவில் பொக்கிஷத்தை ஆக்கிரமிக்கிறதுக்குத்தானே..? ஈஸ்ட் இண்டியா கம்பெனிக்காரங்க நம்ம நாட்டு வளத்தைப் வியாபாரத்து மூலமா பாத்து வியந்துதான் நாட்டையே ஆக்கிரமிச்சாங்க... இப்படி பல உதாரணமிருக்கே..? இந்த கேணிவனம் அப்படி ஒரு உதாரணமாகிடக்கூடாதுன்னு நான் நினைக்கிறேன்'

'சரி தாஸ், இந்த கேணிவனத்தைப் பத்தி யாருக்கும் தெரியாமலே போய், பாழடைஞ்சி காடுமண்டி கிடக்குறதுல என்ன லாபம்...' என்று லிஷா கேட்டாள்

அதுவும் சரிதான் என்று யோசித்த தாஸ், சட்டென்று ஒரு முடிவுக்கு வந்தான்.

'இரகசியத்தை இரகசியமா வைச்சு பாதுகாக்குறதுதான் ரொம்ப கஷ்டம். அதையே பகிரங்கப்படுத்திட்டா, யாருக்கும் அது மேல கவனம் திரும்பாது...' என்றான்

'பகிரங்கப்படுத்துறதா..?'

'எப்படி..?' என்று லிஷாவும் சந்தோஷூம் மாறி மாறி கேட்டனர்.

'இந்த கேணிவனத்தைப் பத்தின விஷயங்களை ஒரு நாவலா எழுதப்போறேன்..'

'பாஸ், எல்லாருக்கும் தெரிஞ்சிடுமே..?'

'எல்லாருக்கும் ஒரு சுவாரஸ்யமான புனைவுக் கதையாத்தான் தெரியும். அது ரொம்ப ரொம்ப சேஃப்... இது உண்மையா இருக்கிற ஒரு விஷயத்தை பத்தின கதைன்னு கெஸ் பண்ண மாட்டாங்க... அப்படி உண்மையா இருந்தா ஏன் இப்படி பகிரங்கமா எழுதப்போறான்-னுதான் நினைக்கத் தோணும். அதே நேரம், அந்த கதையில கேணிவனம் பத்தின உண்மை காலாகாலத்துக்கும் ஒரு அச்சிடப்பட்ட ஆதாரமா கதைவடிவில இருக்கும்... எப்போ இந்த விஷயத்தை வெளியில கொண்டு போகணுமோ அப்போ கொண்டு போயிடலாம்.' என்று தாஸ் கூற, லிஷாவும் சந்தோஷூம் ஆர்வமாக கேட்டுக் கொண்டிருந்தனர்.

'தாஸ், இது சேஃபா..?' என்று லிஷா சந்தேகத்துடன் மெல்லிய குரலில் கேட்டாள்.

'இதுதான் ரொம்ப சேஃப் லிஷா...! இந்த கேணிவனத்தை பத்தின ஆதாரங்களை நம்மகிட்டயே வச்சிருந்தா, சக்கரவர்த்தி, ப்ரொஃபஸர் மாதிரி ஆட்களால என்னிக்கும் நம்ம உயிருக்கு ஆபத்து வரலாம், அப்படியில்லாம இந்த ஆதாரங்களையெல்லாம் எங்கேயாவது சேஃபா ஒளிச்சு வச்சுட்டு, அந்த ஆதாரங்கள் இருக்கிற இடத்தையும் பூடகமா இந்த நாவலோட சேர்த்து இழைச்சுடறேன். வாசகர்களை பொறுத்தவரைக்கும் கேணிவனம் ஒரு சுவாரஸ்யமான நாவல்... ஆனா, நம்மளை பொறுத்த வரைக்கும், அந்த புத்தகம், கேணிவனத்தை ரீச் பண்றதுக்கான ஒரு எழுத்துவடிவிலான மேப்' என்று கூறினான்.

இப்போது இருவருக்கும் இந்த யோசனை புரிந்தும் பிடித்தும் போனது.

'ஓகே பாஸ்... சவுண்ட்ஸ் குட்..' என்று சந்தோஷ் தன் பங்கிற்கு வாக்களித்தான்.

'சேஃபான ரூட்-னுதான் நினைக்கிறேன்...' என்று லிஷாவும் இந்த யோசனைக்கு சம்மதித்தாள்.

சந்தோஷ் கடிகாரம் பார்த்தான்.

'லிஷா?! விசிட்டிங் அவர்ஸ் முடியப்போகுது, நாம போயிட்டு நாளைக்கு காலையில வந்துடலாம்.. பாஸ், நாளைக்கு உங்களை டிஸ்சார்ஜ் பண்றதா சொல்லியிருக்காங்க... நீங்க இன்னிக்கி நைட் நல்லா ரெஸ்ட் எடுங்க... நாளைக்கு நாங்க வந்து உங்களை கூட்டிட்டு போறோம்...'

'ஓகே..! சந்தோஷ் ஒரு நிமிஷம்..? நாளைக்கு வரும்போது, இந்த சித்தரோட சில ஃபோட்டோஸ் ஸ்க்ரீன்ஷாட் எடுத்து ஒரு ப்ளோ-அப் ப்ரிண்ட்-அவுட் எடுத்துட்டு வந்துடு...!' என்று தனது லேப்டாப்-லிருந்து மெமரி கார்டு-ஐ கழட்டிக் கொடுத்தான்.

'அப்படியே என் செல்ஃபோனுக்கு ஒரு பேட்டரியும் வாங்கிட்டு வந்துடு சந்தோஷ்..?' என்று தாஸ் சந்தோஷிடம் கேட்டுக்கொள்ள...

'ஓகே...' என்று கூறி இருவரும் விடை பெற்று சென்றனர்.

--------------------------------

மாலை 7.45...

அந்த ஆஸ்பத்திரி அறையிலிருக்கும் பால்கணியில் நாற்காலி போட்டு தனது லேப்டாப்புடன் தாஸ் அமர்ந்து கொண்டான்.

சென்னையின் இரவு நேர ட்ராஃபிக் லைட்டிங், அந்த பால்கணி வழியாக பார்க்க மிக அழகாக காட்சியளித்தது...

சூழலை சில நிமிடங்கள் ரசித்துவிட்டு, கண்மூடி நடந்து முடிந்த அத்தனையையும் நினைத்துப் பார்த்தான்...

கண்களை திறந்தான்.

தனது லேப்டாப்பில் கேணிவனம் கதையை தட்டச்ச ஆரம்பித்தான்.

[கேணிவனம் - பாகம் - 01

முன்னாள் இரவு சென்ட்ரலில் இருந்து கிளம்பிய அந்த மும்பை மெயில், மேற்கு கர்நாடகாவின் அடர்ந்த காட்டுப்பகுதிகளில் பயணித்து கொண்டிருந்தது. மணி முற்பகல் 11 என்றால் யாரும் நம்பமாட்டார்கள். அவ்வளவு மேகமூட்டத்துடன் அந்த காடு மாலைவேளை போல் காட்சியளித்துக் கொண்டிருந்தது.]

--------------------------------------------------------

அன்றிரவு... சந்தோஷ் தனது அறையில், அந்த சித்தரின் ஃபோட்டோவை ஸ்கரீன்ஷாட் எடுப்பதற்காக தாஸ் கொடுத்த மெமரி கார்டில் பதிவான வீடியோ காட்சிகளை பார்த்துக் கொண்டிருந்தான்.

இன்று உலகில் எத்தனையோ பேர், இயற்கை காட்சிகளை படம்பிடிப்பவர்கள் இருக்கிறார்கள். அவர்கள் என்னதான் முயன்றாலும், இப்படி காலத்தில் பின்னோக்கி சென்று 1000 வருடத்திற்கு முந்தைய இயற்கை காட்சிகளை படம்பிடிக்க முடியுமா..? ஆனால், இதோ, இன்று அவன் பார்த்துக் கொண்டிருக்கும் காட்சிகள் அப்படிப்பட்டவைதான். என்ன ஒரே வருத்தம், இதை காட்சிகளாக மட்டுமே பார்க்க முடிந்தது... நேரில் சென்று பார்த்திருந்தால் இன்னும் நன்றாக இருந்திருக்கும், அந்த வாய்ப்புதான் கிட்டாமல் போய்விட்டதே! என்ற ஆசையும் வருத்தமும் சந்தோஷூக்குள் எழுந்தது...

வேண்டாம் இப்படி ஆசைப்பட வேண்டாம். இது ஆசையல்ல பேராசை...

ஏற்கனவே பேராசையால் பைத்தியமான குணாவின் நினைவு வந்தது... குணாவை எண்ணி சந்தோஷ் வருந்தவும் செய்தான். காலம் அவனை தேற்றும் என்று எண்ணிக் கொண்டான். இனி அந்த கேணிவனத்தை பற்றி ஆசைப்படக்கூடாது என்று முடிவெடுத்தான்.

இருப்பினும், இந்த வீடியோ கேணிவனம் இருப்பதற்கான வலுவான ஆதாரம். இவ்வளவு அரிய விஷயத்தை மிகவும் சர்வ சாதாரணமாக தன்னை நம்பி கையில் கொடுத்திருக்கும் தாஸ்-ஐ எண்ணி சந்தோஷ் வியந்து கொண்டிருந்தான்.

இதை கொண்டு போய் யாரிடமாவது நாம் கொடுத்தால் என்னவாகும்..? அவரவர்கள் எண்ணத்திற்கேற்ப இதை உபயோகித்து கொள்வார்கள்.

உதாரணத்திற்கு, இதை சக்கரவர்த்தியிடம் கொண்டு போய் கொடுத்தால், அவன் ப்ரொஃபஸர் கணேஷ்ராமையும் தன்னையும் கொன்றுவிட்டு தனியாளாக கேணிவனத்தை மீண்டும் தேட ஆரம்பித்திருப்பான்...

ப்ரொஃபஸர் கணேஷ்ராமிடமே கொடுத்தால், அவர் இதைவைத்து வரலாற்றில் தன் பெயரை இடம்பெறும்படி செய்து கொள்வார்... ஆனால் தனது முதுமையினால் தனியாளாக இதை தேட முடியாமல் மீண்டும் சக்கரவர்த்தியின் உதவியை நாடியிருப்பார்.

இன்ஸ்பெக்டர் வாசுவிடம் கொடுத்தால், அவர் இதுபோன்ற சூப்பர்நேச்சுரல் விஷயங்கள் உண்மையா என்று சோதனை செய்து பார்த்து தனது தர்க்க ரீதியான நம்பிக்கைகளை தெளிந்து கொண்டிருப்பார். ஆனால் அவரும் அதன்பிறகு என்னவாக வேண்டுமானாலும் மாறலாம்.

இப்படி எதுவும் செய்யாமல், இதையே திரும்ப கொண்டு போய் தாஸிடம் கொடுத்தால்... அவர்தான் அந்த சித்தரின் எண்ணத்தை புரிந்துக் கொண்டு இதை பத்திரப்படுத்தி வைப்பார்.

லிஷா சொன்னதுபோல் இது ஒரு டைம் ட்ரெஷர்... அதனால், தாஸ் எடுத்த முடிவுதான் சரியானது...

பொக்கிஷத்தின் தன்மை அதை செலவழிப்பதில் இல்லை...! பாதுகாத்து வைப்பதில்தான் இருக்கிறது.

சந்தோஷ் மனதிற்குள் இப்படிப்பட்ட எண்ணங்கள் ஓடிக்கொண்டிருக்க, அவன் கண்களிரண்டும் ஆச்சர்யத்தில் விரிந்து அந்த வீடியோ காட்சிகளை கண்டுகொண்டிருந்தது...

அந்த காட்சிகளிலிருந்து, அந்த சித்தரின் வெவ்வேறு கோணத்தில் இருக்கும் ஃபோட்டோக்களை ஸ்க்ரீன்ஷாட் எடுத்து தெரிவு செய்துக் கொண்டிருந்தான்.

வீடியோவில்...

சித்தரின் பிரேதத்தை தாஸ் கோவில் கூரையிலிருந்து இறக்கிக் கொண்டிருக்கும் காட்சிகளை ஓட்டி ஓட்டி பார்த்துக் கொண்டிருந்தான். இருட்டில் ஷூட் செய்ய உதவும் இன்ஃப்ரா ரெட் வெளிச்சத்தில் எடுக்கப்பட்டிருந்த காட்சிகளவை. அதில் தாஸ் ஒரு கையில் ஹேண்டிகேமிராவுடன் மறுகையில் சித்தரின் பிரதேத்தை எடுத்துக் கொண்டு வெளியேற போராடிக் கொண்டிருக்க... சித்தரின் உடம்பிலிருந்த ஒரு ஓவியம் கேமிராவில் பதிவாகியிருந்தது... அது சந்தோஷின் கண்களை கவர்ந்தது...

அதை மட்டும் ஃப்ரீஸ் செய்து பார்த்தான்.

அது ஓவியமல்ல... ஒரு பாடல்... என்று தெரிந்தது... அதை படிக்க முயற்சி செய்தான். கொஞ்சம் சிரமமாக இருந்தது... அந்த ஃபோட்டோவை மட்டும் ஃபோடோஷாப்பில் ஏற்றி, அந்த பாடலை படிக்குமாறு ப்ராஸஸ் செய்தான்.

ஃபோட்டோஷாப் ஜாலத்தினால், அந்த பாடலை இப்போது தெளிவாக படிக்க முடிந்தது...

அந்த பாடல், தாஸூக்கு சொல்லப்பட்ட ஏதோ ஒரு ரகசிய தகவல் போல் இருந்தது... உடனே தனது செல்ஃபோனை எடுத்து தாஸூக்கு டயல் செய்தான்.

The Number you are trying is currently Switched Off...

'ஸ்விட்ச்டு ஆஃப்' செய்யப்பட்டிருப்பதாக செய்தி ஒலித்தது...

தாஸின் செல்ஃபோனில்தான் பேட்டரி இல்லையே என்ற விஷயம் அப்போதுதான் ஞாபகம் வந்தது...

------------------------------------

அதே 'ஸ்விட்ச்டு ஆஃப்' என்ற இயந்திரக்கன்னியின் ஆபரேட்டர் குரல் கந்தன் கொள்ளை கிராமத்தில், தாஸின் தாத்தா வீட்டிலிருந்த லேண்ட்லைன் ஃபோன் மூலமாக சுசீலாம்மாவின் காதினில் கேட்டுக் கொண்டிருந்தது....

(தொடரும்...)